Flug­freyjan frestaði íbúðakaupum og fórnaði sparnaðinum í flug­nám

Í fréttum Stöðvar 2 mátti sjá kafla úr þættinum Flugþjóðin þar sem Stöðvar 2-menn slógust í för með áhöfn júmbó-þotu Air Atlanta í fraktflugi um Afríku.

Afríkuflug Atlanta er orðið verulega umfangsmikið. Þetta eru átján ferðir á viku, nærri þrjár á dag, sem flugfélagið fer með stútfulla risaþotu af blómum frá Afríku til Evrópu. Í þessu flugi var þó byrjað á að flytja eitthundrað tonn af lyfjum frá Liege í Belgíu til Jóhannesarborgar í Suður-Afríku.

Í flugstjórnarklefa Boeing 747-400, TF-AMI, í 35 þúsund feta hæð yfir Afríku, sjáum við Telmu Rut Frímannsdóttur setjast í flugstjórasætið.

„Ég sótti um sem flugfreyja hjá Wow air, fékk þá vinnu og byrjaði í desember 2017. Eftir svona mánuð þá bara áttaði ég mig á því að ég gæti flogið flugvél sjálf, var þarna í fimm mánuði og skráði mig svo í flugnám. Og hér er ég,“ segir Telma.

Hér má sjá frétt Stöðvar 2:

Telma Rut var í stöðu afleysingaflugmanns með takmörkuð réttindi sem þriðji flugmaður um borð ásamt Róberti Kristmundssyni yfirflugstjóra Air Atlanta og Þorsteini Steindórssyni. Staðan kallast „cruise relief“ og er hluti af þjálfunarferli flugmanns. Sjálf hafði hún engan bakgrunn í fluginu þegar hún hóf flugnám.

„Það er enginn í kringum mig flugmaður, það er enginn í kringum mig í neinu af fluggeiranum.“

-Þetta var ekki of hátt fjall til að klífa? Þetta er ekki ódýrt nám.

„Nei, þetta er ekki ódýrt nám. En ég var bara alveg harðákveðin í að þetta væri fyrir mig og fannst þetta alveg geggjað. Þá var bara að kýla á það.“

-Var ekkert mál að fjármagna flugnámið?

„Ég var búin að safna einhverjum peningi, ætlaði að fara að kaupa mér íbúð. Þannig að hann fór bara í flugnámið fyrst,“ svarar Telma og hlær.

Fimm mánuðum eftir að þetta viðtal var tekið var hún búin að afla sér fullgildra réttinda sem flugmaður á Boeing 747.

Í borginni Nairobi sjáum við Telmu annast forskoðun flugvélarinnar meðan hún er fyllt af blómum og kryddjurtum. Blómin eru á leið til Amsterdam þar sem blómaheildsalar kaupa þau á uppboðsmarkaði og dreifa þeim svo áfram víðsvegar um Evrópu. Og flestir halda að þau séu hollensk þegar þau eru í raun frá blómabændum í Kenýa.

Sjötti þáttur Flugþjóðarinnar næstkomandi mánudagskvöld 7. október nefnist Fólkið í fluginu. Þá hittum við fjölda núverandi og fyrrverandi starfsmanna úr fluggeiranum, rýnum í flugáhugann á Íslandi, spyrjum hversvegna Íslendingar urðu flugþjóð og heyrum mergjaðar flugsögur.

Áskrifendur Stöðvar 2 og Stöðvar 2+ geta séð þættina um Flugþjóðina í streymisveitu Stöðvar 2 hvar og hvenær sem er. Hér má sjá kynningarstiklu fyrir þáttaröðina: