Ekki ó­skyn­sam­legt að koma sér upp neyðar­birgðum

Þetta sagði Jóhann Friðrik í viðtali í Bítinu á Bylgjunni í morgun. Þar voru ræddar fréttir frá Danmörku um að Danir væru hvattir til að eiga matarbirgðir, vatn, lyf og aðrar vistir til minnst þriggja daga til að vera viðbúnir mögulegu neyðarástandi. Kom þar fram að um fjórar og hálf milljón Dana sem hafi náð átján ára aldri muni fá bréf frá stjórnvöldum þess efnis á næstu vikum.

„Nú hefur ekki verið gefin út nein tilskipun þessa efnis – svo ég viti – fyrir íslenskt samfélag, en ég verð að segja sjálfur að mér finnnst margt mjög lógískt á þessum lista. Að sýna einhverja fyrirhyggju,“ segir Jóhann Friðrik.

Mælt með ýmsum búnaði

Sérstöku krísuráði Neyðar- og almannavarnastofunar danska ríkisins var í sumar falið að útbúa ráðleggingar til borgara um hvernig sé best að búa sig undir mögulegt neyðarástand, hvort sem það sé af völdum veður- eða náttúruhamfara, stríðs, netárása, fjölþáttaógna eða annars sem kynni að skapa neyðarástand í landinu.

Á listanum segir að mælt sé með því að vera með sjúkrakassa og joðtöflur fyrir fólk undir fjörutíu ára að aldri, þungaðar konur og konur með barn á brjósti. Einnig er mælt með hreinlætisvörum, hitagjafa, hleðslubanka, rafhlöðum, vasaljós, greiðslukort og eftir atvikum reiðufé í mynt og seðlum og svo aðgang að útvarpi sem gengur fyrir rafhlöðum.

Ekkert sérstaklega vel undirbúin

Jóhann Friðrik segir þetta alls ekki vera neitt óskynsamlegt þó að ekki sé búið að hækka almannavarnastig í Danmörku. 

„Við erum með það hér að ef eitthvert slíkt kemur til þá auðvitað koma stjórnvöld til með að gefa út slíkar upplýsingar til almennings.“

Þannig að þér fyndist skynsamlegt að við sem höfum náð átján ára aldri fengjum svona bréf inn um lúguna, þó að ekki sé nein sérstök yfirvofandi ógn?

„Nú hefur þetta ekki sérstaklega verið rætt í þjóðaröryggisráði og kann að vera að svipuð verkefni komi á okkar fjörur. Ég held bara að umræðan um þjóðaröryggi og öryggi almennt, hún kemur upp þegar eitthvað er í gangi og þá oft rekumst við á það að við séum ekkert sérstaklega vel undirbúin. Ég held að staðan sé þannig á Íslandi eins og í nágrannalöndunum líka. 

Við höfum í þjóðaröryggisráði, til að mynda, verið að taka saman upplýsingar og hafa verið gerðar skýrslur hér á landi um neyðarbirgðir. Í skýrslu frá 2020 kemur fram að heimilin í landinu eru ekki sérstaklega vel stödd hvað neyðarbirgðir varðar. Það er eitthvað sem við þurfum að skoða. Við getum því alveg tekið þetta til okkar. Þó að ekki sé búið að fara sérstaklega yfir þetta á okkar vettvangi þá finnst mér þetta að mörgu leyti lógískt.“

Hlusta má á viðtalið við Jóhann Friðrik í heild sinni í spilaranum að neðan.

3dagar – verkefni Rauða krossins

Rauði krossinn á Íslandi hefur um nokkurt skeið starfrækt verkefnið 3dagar þar sem heimili á landinu er hvött til að koma sér upp birgðum þannig að það geti verið sjálfu sér nægt í þrjá daga ef hamfarir og neyðarástand myndi dynja yfir. 

Þar hefur einnig verið tekið saman allt það sem talið er nauðsynlegt að hafa í viðlagakassa. Þar er einnig bent á síðu á vef almannavarna þar sem hægt er að kynna sér enn betur hvað er gott að eiga.