Enginn í sögu Evrópumótsins lagt upp fleiri mörk en Lamine Yamal

Yamal gaf fjórðu stoðsendinguna í gær þegar hann lagði upp opnunarmark úrslitaleiksins gegn Englandi á Nico Williams. 

Fjórir aðrir hafa náð sama afreki. Ljubinko Drulovic (fyrir Júgóslavíu 2000), Aaron Ramsey (fyrir Wales 2016), Eden Hazard (fyrir Belgíu 2016) og Steven Zuber (fyrir Sviss 2020/21).

Auk þess að vera stoðsendingahæsti maður mótsins er Yamal sá eini í sögunni sem hefur skorað eða lagt upp mark í 8-liða, undanúrslitum og úrslitaleiknum.

Stoðsendingar voru reyndar ekki færðar til bókar fyrr en á mótinu 1980. Afrekið engu að síður ótrúlegt og Yamal var verðskuldað valinn besti ungi leikmaðurinn á verðlaunaafhendingu mótsins í gær.

Yamal varð 17 ára síðasta laugardag og hefur skráð sig á spjöld sögunnar sem yngsti markaskorari Spánar, yngsti leikmaður til að spila á EM og sá yngsti til að skora og leggja upp mark á mótinu. Þar að auki á hann að baki 51 leik með aðalliði Barcelona.

Samanburður við bestu leikmenn allra tíma er þegar hafinn en þar má nefna að Lionel Messi og Cristiano Ronaldo höfðu hvorugir spilað landsleik áður en þeir urðu 17 ára.

Meira að segja ein frægasta táningsstjarna sögunnar, Wayne Rooney, hafði aðeins komið við sögu í tíu leikjum með Everton og ekki spilað landsleik áður en hann varð 17 ára.