Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.
Hvað finnst þér skemmtilegast við tískuna?
Hvað hún er breytileg og fjölbreytt. Það er bara svo gaman að pæla í tísku og ég elska að fylgjast með því hvernig aðrir túlka tísku.
Hver er uppáhalds flíkin þín og af hverju?
Mínar uppáhalds flíkur í augnablikinu er pils frá Lindex sem passar við allt og mér finnst ég geta klætt það upp og niður. Ég er alltaf mjög skotin í yfirhöfnum og nýi frakkinn minn er í miklu uppáhaldi núna.
Síðan er það hvítur toppur frá GANNI sem ég keypti mér um daginn í Andrá, mjög sumarlegur og sætur. Ég elska líka kúrekastígvélin mín frá Jodis. Síðan er ég mjög mikið fyrir fylgihluti og finnst það oft setja punktin yfir i-ið.
Eyðirðu miklum tíma í að velja föt hverju sinni?
Mér finnst það bara fara eftir dagsforminu. Stundum veit ég alveg í hverju ég ætla en stundum á ég mjög erfitt að velja.
Hvernig myndirðu lýsa stílnum þínum?
Ég myndi segja að stílinn minn væri mjög klassískur, skandinavískur og rómantískur en samt með eitthvað smá „edge“. Mér finnst oft gaman að vera í kjól eða pilsi, með rósir, með hárið blásið og para það síðan við strigaskó eða gróf stígvél.
Hefur stíllinn þinn breyst mikið í gegnum tíðina og hvernig þá?
Já ég myndi segja það. Einu sinni var ég kannski meira að reyna falla inn og velja bara eitthvað „save“ en núna vil ég helst bara eiga eitthvað sem ekki margir eiga og dett ekki inn í hvert einasta trend. Ég klæði mig meira eftir því sem fer mér vel.
Nýturðu þess að klæða þig upp?
Já ég elska það!
Mér finnst oft skemmtilegra að gera mig til fyrir partý-ið heldur en að mæta í partý-ið sjálft, sérstaklega eftir að ég eignaðist börnin.
Ég hef ekki mikinn tíma til að græja mig þessa dagana.
Hvaðan sækirðu innblástur í tískunni?
Ég nota mikið bara instagram og pinterest. Mér finnst samt alltaf gaman að skoða tímaritin en þá helst á netinu og skoða oft hvað verður að „trenda“ eða í tísku hverja árstíð fyrir sig.
Ertu með einhver boð og bönn þegar það kemur að klæðaburði?
Nei ekkert sem mér dettur í hug. Kannski bara fyrir mig að klæða sig eftir veðri, ég gleymi því sjálf mjög oft að ég bý á Íslandi. Svo er mikilvægt að líða vel í fötunum sem ég klæðist.
Hver er eftirminnilegasta flík sem þú hefur klæðst og af hverju?
Mér finnst alltaf mjög gaman að vera í fínum kjól eins og frá elsku Hildi Yeoman. Það er eins og maður fái extra mikið sjálfstraust og mér líður svo fínni. Síðan er ég ennþá með augun á Saks Potts kápunni sem ég mátaði í Andrá fyrr í vetur.
Býrðu yfir einhverju góðu ráði þegar það kemur að tísku?
Að finna út úr því hverju manni líður vel í og vera samkvæmur sjálfum sér. Síðan að reyna eins og maður getur að velja gæða yfir annað, quality over quantity. Ég er sjálf að reyna venja mig á þetta, vanda valið og reyna að velja eitthvað sem ég veit að ég gæti notað á marga vegu.
Síðan er alltaf gaman að fara út fyrir þægindarramman og sjálfstraustið er besti fylgihluturinn!
Hér má fylgjast með Guðrúnu á samfélagsmiðlinum Instagram.
