Máli Rashfords lokið og hann gæti spilað gegn Úlfunum

Talið er að Man United muni sekta leikmanninn um tveggja vikna laun eða tæpar 115 milljónir íslenskra króna. Það er þó talið ólíklegt að það verði gert opinbert þar sem Man United hefur gefið út að málinu sé nú lokið.

Hinn 26 ára gamli Rashford skrifaði undir nýjan fimm ára risasamning við Man United síðasta sumar eftir að hafa verið einn albesti leikmaður liðsins á síðasta tímabili. 

Síðan þá hefur Rashord lítið sem ekkert getað og toppaði hann arfaslakt tímabil með því að vera út á djamminu í Belfast í Norður-Írlandi skömmu áður en hann átti að mæta á æfingu á föstudaginn.

Á endanum mætti hann ekki á æfingu eftir að hafa tilkynnt veikindi. Í kjölfarið var hann ekki í leikmannahóp Man Utd sem lagði Newport County 4-2 í 4. umferð ensku bikarkeppninnar. 

Eftir leik sagði Erik ten Hag, þjálfari Manchester-liðsins, að fjarvera Rashford væri innanbúðarmál sem yrði tekið á innan veggja Man United.

Enska götublaðið The Sun greindi frá því að leikmaðurinn yrði að öllum líkindum sektaður um tveggja vikna laun og þá er óvíst hvenær Ten Hag muni velja hann að nýju. 

Samuel Luckhurst, blaðamaður staðarblaðsins Manchester Evening News, greindi frá því að Dwayne Maynard – eldri bróðir sem og umboðsmaður Rashford – hefði sést á Carrington-æfingasvæðinu. Í færslu á X-síðu sinni, áður Twitter, lætur Luckhurst það hljóma eins og Maynard sé þar til að ræða bæði meint veikindi Rashford sem og annað mál.

Nú hefur Manchester United gefið út yfirlýsingu þar sem segir að málinu sé lokið. Rashford axli ábyrgð á gjörðum sínum og málið sé nú úr sögunni. Einnig kemur fram í frétt Sky Sports að Rashford eigi möguleika á að vera í leikmannahóp liðsins þegar Man United sækir Úlfana heim á fimmtudaginn kemur, 1. febrúar.

Erik ten Hag gagnrýndi „menninguna“ hjá félaginu þegar hann tók við sumarið 2022. Hollendingurinn hefur nú þegar sýnt styrk sinn með því að bekkja Cristiano Ronaldo, og senda hann í kjölfarið til Sádi-Arabíu, eftir að Portúgalinn neitaði til að mynda að koma inn á gegn Tottenham Hotspur. 

Að sama skapi var Jadon Sancho sendur á láni til Borussia Dortmund eftir að neita að biðjast afsökunar á ummælum sínum í garð þjálfarans. Stóra spurningin er hvort Rashford feti í fótspor þeirra þegar fram líða stundir eða endurtaki leikinn frá því á síðustu leiktíð þegar hann spilaði nær óaðfinnanlega leik eftir leik.

Manchester United mætir Bristol City eða Nottingham Forest á útivelli í 5. umferð FA Cup. Er bikarkeppnin eini raunhæfi möguleiki liðsins á verðlaunum á leiktíðinni þar sem það er fallið úr leik í Meistaradeild Evrópu, enska deildarbikarnum og situr í 8. sæti ensku úrvalsdeildarinnar.

Fréttin hefur verið uppfærð.