Grunar að palestínskur söngvari keppi í Söngva­keppninni

Mikil umræða hefur skapast um ákvörðun RÚV, sem það kynnti í gær, um að taka ekki ákvörðun um þátttöku í Eurovision í Svíþjóð fyrr en að lokinni Söngvakeppni sjónvarpsins. Söngvakeppnin hefst, ef svo má segja, á laugardag þegar keppendur verða kynntir til leiks. 

RÚV hefur verið beitt miklum þrýstingi að taka ekki þátt í Eurovision vegna þátttöku Ísrael í keppninni, í ljósi stríðsins á Gasaströndinni. Margir hafa gagnrýnt og jafnvel gert grín að afstöðu RÚV um að bíða með að taka ákvörðun og einhverjir sagt galið að ákvörðunin sé sett á herðar sigurvegarans. 

Umræða um þetta skapaðist meðal annars undir innleggi Mána Péturssonar, þar sem hann gagnrýnir ákvörðun RÚV. Undir færsluna skrifar Ágústa Eva Erlendsdóttir listakona og fyrrverandi Eurovision keppandi í athugasemd að það gæti verið að palestínskur söngvari vinni Söngvakeppnina. 

„Þetta er hugmynd sem ég fékk fyrir svona tveimur mánuðum síðan og sendi á RÚV og nokkra aðra, nokkra aðila sem eru með lög. Maður verður að hugsa svolítið strategískt. Fjarvera er auðvitað bara fjarvera en hvað sendit sterk skilaboð. Hann minntist líka á þetta söngvarinn í Hatara, hann sagði að það væri rétt að Palestína fengi að vera með ef Ísrael má vera með,“ segir Ágústa Eva í samtali við fréttastofu.

„Það væri kannski bara sniðugt múv að láta heiminn kjósa, hvað honum finnist. Það gæti verið sterkt, hvernig við kjósum að standa með mannréttindum. Þetta gæti verið sterk leið og þá gæti fólk sýnt það í verki og kosið með mannréttindum.“

„Ekki stríð, þetta eru fjöldaaftökur“

Hún segist finna vel fyrir því að vilji fólksins sé á skjön við vilja þeirra sem með valdið fara. Með þessu gæti íslenska þjóðin sýnt afstöðu sína til átakanna fyrir botni Miðjarðarhafs án aðkomu yfirvalda. 

Ekkert má gefa upp væntanlega keppendur í Söngvakeppninni fyrr en á laugardag en Ágústa segist hafa sínar grunsemdir.

„Ég hef mjög sterkar vonir um að þetta verði raunin, það væri sterkast fyrir alla. Ég er búin að heyra mjög jákvæðar raddir en er ekki búin að fá staðfest að þetta sé svona. Ég er samt búin að fá, það sem ég tel vera vísbendingar um að þetta verði, og þá skil ég þessa afstöðu RÚV,“ segir Ágústa og vísar til ákvörðunar RÚV um að taka ákvörðun um þátttöku í Malmö eftir Söngvakeppnina. 

Ágústa er ein 550 tónlistarmanna sem skrifaði undir lista til að þrýsta á RÚV að draga sig úr keppninni. Hún segist ekki endilega viss um að það sé sterkasta leiðin til að sýna afstöðu Íslands en fyrst og fremst verði afstaða almennings að koma fram. 

„Númer eitt, tvö og þrjú er að þrýsta á sjónvarpið að koma þessari afstöðu okkar á framfæri: Að við viljum ekki vera í partýi með einhverjum sem er í þessum töluðu orðum að fremja þjóðarmorð. Þetta er ekki stríð, þetta eru bara fjöldaaftökur. Þetta eru ekki tvær þjóðir sem eiga í einhverjum erjum.“

Góð leið til að sýna hvað við höfum fram að færa

Sögusagnir hafa gengið um að Bashar Murad, palestínskur hinsegin tónlistarmaður sem gaf út lag með Hatara eftir Eurovision-ævintýri sveitarinnar í Tel Aviv, muni taka þátt í Söngvakeppninni. Til að mynda sást til hans á dögunum í Vesturbæjarlauginni þar sem Unnsteinn Manuel, einn kynna Söngvakeppninnar, var að taka við hann sjónvarpsviðtal. 

Bashar veitti fréttastofu viðtal árið 2019 í kjölfar útgáfu lags hans og Hatara, Klefi/Samed. Horfa má á viðtalið í heild sinni hér að neðan. 

Ágústa segist ekki hafa heyrt Bashar nefndan sérstaklega en hún sé á þeim vagni að það væri mjög sterkt ef Ísland fengi palestínskan tónlistarmann til að flytja sitt framlag í Eurovision. 

„Og ef þetta er raunin skil ég af hverju RÚV vill halda keppnina og sýna hvað við getum fært á borðið á þessum alþjóðlega vettvangi, þegar allir eru að horfa. En ef það á að kasta Jóni Jónssyni fyrir lestina og hann á að ákveða hvort við förum í partýið er það fáránlegt. Ég vona að þetta sé raunin.“

Hún segist viss um að afstaða margra til keppninnar og RÚV myndi breytast ef palestínskur tónlistarmaður er í hópi keppenda. 

„Alveg pottþétt. Þetta er fyrst og fremst að við viljum standa með mannréttindum og hvernig við förum að því.“