Töl­fræðin á móti Frakk­landi: 22 mörk og 16 stoð­sendingar frá bekknum

Íslenska karlalandsliðið í handbolta tapaði með sjö mörkum á móti Frökkum, 32-39, í öðrum leik sínum í milliriðli á Evrópumeistaramótinu í Þýskalandi.

Það var mikill munur á liðunum enda varnarleikur íslenska liðsins langt frá því að vera sá sami og á móti Þjóðverjum í leiknum á undan.

Íslenska liðið lenti eftir á strax í upphafi leiks og Snorri Steinn Guðjónsson þurfti að taka leikhlé eftir ellefu mínútur.

Sóknarleikur Íslands gekk betur í þessum leik en þó aðeins eftir að Snorri Steinn skipti út byrjunarliðsmönnunum sem áttu allir slakan leik fyrir utan Elliði Snær Viðarsson.

Það jákvæða við leikinn var því innkoman af bekknum en Óðinn Þór Ríkharðsson og Haukur Þrastarson stimpluðu sig inn í mótið og þeir Viggó Kristjánsson og Gísli Þorgeir Kristjánsson komu líka öflugir inn í sóknina.

Íslenska liðið fékk 22 mörk og 16 stoðsendingar frá mönnum af bekknum en byrjunarliðsmennirnir skiluðu aðeins 10 mörkum þar af komu sex þeirra frá Elliða.

Vörn íslenska liðsins átti engin svör við frábærum sóknarleik franska liðsins sem skoraði alls 25 mörk fyrir framan mitt markið með 12 mörkum úr langskotum og 13 af línunni. Þeir voru þá annað hvort búnir að þrýsta vörninni niður á teig eða galopna línuna. Nedim Remili var þar allt í öllu en hann gaf þrettán stoðsendingar í leiknum.

Markvarslan brást en flest skotin komu þó úr alltof góðum færum eftir að franska sóknin hafði farið illa með varnarmenn íslenska liðsins.

Vísir fylgist vel með tölfræði íslenska liðsins á mótinu og hefur nú tekið saman þá leikmenn sem sköruðu fram úr í tölunum í þessum fimmta leik Íslands á mótinu.

Hér fyrir neðan má sjá toppa íslenska liðsins í tölfræðinni.