Innlent

Breið­fylking að myndast til að ná niður vöxtum og verð­bólgu

Heimir Már Pétursson skrifar
Ragnar Þór Ingólfsson segir að nú þegar sé búin að mynda breiðfylkingu innan verkalýðshreyfingarinnar sem ætti að geta náð samningum við SA, með aðkomu stjórnvalda, í næsta mánuði.
Ragnar Þór Ingólfsson segir að nú þegar sé búin að mynda breiðfylkingu innan verkalýðshreyfingarinnar sem ætti að geta náð samningum við SA, með aðkomu stjórnvalda, í næsta mánuði. Stöð 2/Arnar

Formaður VR er bjartsýnn á að breiðfylking stéttarfélaga nái að gera sögulega kjarasamninga í janúar sem stuðli að verðbólguhjöðnun og vaxtalækkunum. Það skipti meira máli en nokkrir þúsundkallar til eða frá í launahækkunum.

Formenn landsambanda verkalýðsfélaga og stærstu félaganna á almenna vinnumarkaðnum funduðu í gær þar sem ekki tókst að ná samstöðu allra innan Alþýðusambandsins um stefnuna í komandi kjarasamningum. Ragnar Þór Ingólfsson formaður VR segir að engu að síður væri breiðfylking að myndast.

„Við erum, hvað á ég að segja, 95 prósent af Alþýðusambandinu, eða félögum innan Alþýðusambandsins sem ætlum að halda þessari vinnu áfram. Það er mun stærri og öflugri hópur en var til dæmis á bakvið lífskjarasamninginn 2019,“ segir Ragnar Þór.

Innan verkalýðshreyfingarinnar er ríkur vilji til að líta til lífskjarasamninganna svo kölluðu sem gerðir voru árið 2019 og tryggðu launafólki aukinn kaupmátt.Vísir/Vilhelm

Þannig ætli fjölmennustu félögin VR og Efling, ásamt Landsambandi íslenskra verslunarmanna, Starfsgreinasambandinu og Samiðn að halda hópinn. Einhver félög innan samtaka iðnaðarmanna muni væntanega einnig slást í för. Komandi kjarasamningar til nokkurra ára snúist ekki um krónutölur.

„Þetta snýst í rauninni um að gera kjarasamning sem vinnur niður verðbólgu og vaxtastigið. Þar eru langmestu hagsmunirnir. Síðan fjöldamörg önnur mál sem snúa að kerfisbreytingum, til dæmis varðandi húsnæðislánamarkaðinn. Síðan tilfærslukerfin. Þar eru stóru tölurnar og þar er miklu meira undir en krónur eða þúsundkallar til eða frá í launahækkanir,“ segir formaður VR.

Ragnar Þór Ingólfsson formaður VR segir skipta höfuðmáli að gera samninga sem nái niður verðbólgu og vöxtum. Vísir/Vilhelm

Fyrst þurfi að ná samningum við Samtök atvinnulífsins en síðan verði stjórnvöld og Seðlabanki að koma að málum.

„Ef við náum nægilega stórum hópi til að vinna að þessu markmiði þá gætum við mögulega gert tímamótasamning í janúar,“ segir Ragnar Þór. Misjöfn sjónarmið væru vissulega uppi innan verkalýðshreyfingarinnar um krónutöluhækkanir eða blandaða leið. En það væri miklu meira undir í komandi kjarasamningum sem skipti miklu meira máli.

„Og ef við getum náð árangri bæði varðandi tilfærslukerfin, vaxtabóta- og húsnæðisbótakerfin, barnabætur, húsnæðismarkaðinn og sömuleiðis húsnæðislánakerfið okkar. Miklu fleiri atriði sem við erum að ræða sem eru risastór hagsmunamál almennings, þá á launaliðurinn ekki að vera ágreiningsefni eins og hann er og hefur verið,“ segir Ragnar Þór Ingólfsson.

Kjaraviðræður 2023 Kjaramál Efnahagsmál Verðlag Ríkisstjórn Katrínar Jakobsdóttur Seðlabankinn ASÍ Stéttarfélög

Tengdar fréttir

Ekki samstaða innan ASÍ um áherslur í komandi kjaraviðræðum

Ekki tókst að ná samstöðu um að landsambönd og félög innan Alþýðusambandsins fari sameiginlega fram í viðræðum við Samtök atvinnulífsins í komandi kjaraviðræðum. Forseti ASÍ segir samningaviðræður geta orðið flóknari fyrir vikið en vonar engu að síður að nýir samningar náist áður en núgildandi samningar renna út í lok janúar.

Frost í viðræðum flugumferðarstjóra og SA

Ekki hefur verið fundað formlega í deilu flugumferðarstjóra og Samtaka atvinnulífsins í dag. Innviðaráðherra segir deiluaðila verða að sýn ábyrgð og leysa deiluna við samningaborðið en útilokar ekki stjórnvöld grípi inn í með lagasetningu. Sáttasemjari segir að litið sé til þess að gera skammtímasamning. 

Regluleg heildarlaun voru hæst hjá ríkisstarfsmönnum

Á fyrri helmingi þessa árs dróst kaupmáttur ráðstöfunartekna saman um 2,7 prósent á milli ára en laun á mann hækkuðu um 8,6 prósent á fyrri helming 2023. Regluleg heildarlaun voru almennt hæst hjá ríkisstarfsmönnum í maí eða 880 þúsund krónur. Launin voru 29 þúsund krónum hærri en þegar litið er til heildarlauna allra hópa.

Þolimæði stjórnvalda að þrotum komin

Þolinmæði stjórnvalda gagnvart verkfallsaðgerðum flugumferðarstjóra er við það að bresta. Innviðaráðherra ætlast til að deiluaðilar setjist að samningaborðinu og leysi deiluna. Aðgerðir flugumferðarstjóra hafa nú þegar haft bein áhrif á ferðatilhögun hátt í þrjátíu þúsund farþega íslensku flugfélaganna.

Mest lesið


Fleiri fréttir

Sjá meira


×

Mest lesið