Chelsea kláraði botnliðið í síðari hálf­leik

Chelsea hafði tapað síðustu tveimur leikjum sínum í ensku úrvalsdeildinni fyrir leikinn í dag en andstæðingur dagsins Sheffield United var á botninum fyrir leikinn með aðeins átta stig.

Fyrri hálfleikur var tíðindalítill og gekk heimamönnum illa að finna glufur á vörn gestanna. Í síðari hálfleik gekk það hins vegar betur. Á 54. mínútu skoraði Cole Palmer með skoti frá markteig eftir sendingu Raheem Sterling og sjö mínútum síðar skoraði Nicolas Jackson eftir sendingu Palmer.

Chelsea fékk færi til að bæta við mörkum. Armando Broja fékk það besta en hann skaut yfir markið úr algjöru dauðafæri eftir góðan undirbúning Palmer.

Lokatölur á Brúnni 2-0 og Chelsea lyftir sér þar með upp í tíunda sæti deildarinnar.