Þórir varar sínar stelpur við að lenda ekki í því sama og Danir

Danska landsliðið hafði farið tiltölulega auðveldlega í gegnum sína leiki á mótinu eða þar til þær mættu Japan í fyrsta leik sínum í milliriðli í gær.

Danir töpuðu þar 26-27 eftir að hafa fengið á sig sigurmark á síðustu sekúndunum. Þetta eru ein óvæntustu úrslit mótsins til þessa.

Norðmenn unnu átján marka sigur á Angóla í sínum fyrsta leik í milliriðlinum og unnu leikina þrjá í riðlinum með 19,7 mörkum að meðaltali. Þær eru á mikilli siglingu en eiga eftir tvo erfiðustu leikina í millriðlinum.

„Þetta segir okkur að það eru þjóðir utan Evrópu sem kunna alveg handbolta. Það segir okkur líka að við höldum stundum að annað liðið eigið að vinna þó ég segi ekki að þetta hafi verið vanmat hjá Dönum. Þetta sýnir samt að leikmenn verða alltaf að halda einbeitingunni á næsta leik og næstu sókn,“ sagði Þórir.

Norska liðið mætir Slóveníu í Þrándheimi í kvöld. Þórir fékk góðar fréttir í dag því Kari Brattset Dale er leikfær. Hún meiddist á ökkla fyrir nokkrum dögum.

Þórir gaf aftur á móti ekkert upp hvort hún myndi spila í leiknum í kvöld.

Þórir ætlar að halda sig við það að tilkynna ekki liðið fyrr en klukkutíma fyrir leikinn en reglurnar leyfa slíkan feluleik.