Ronaldo bað dómarann um að snúa við dómnum eftir að hann fékk víti

Ronaldo og félagar hans í Al-Nassr mættu íranska liðinu Persepolis í Meistaradeild Asíu í kvöld og strax á annarri mínútu féll portúgalski framherjinn við innan vítateigs.

Dómari leiksins, hinn kínverski Ma Ning, flautaði í flautu sína og dæmdi vítaspyrnu, en Ronaldo var ekki sammála dómnum og sannfærði dómara leiksins um að endurskoða dóminn. Ma Ning var að lokum sendur í VAR-skjáinn góða og snéri dómnum við eftir að hafa skoðað atvikið betur.

Heiðarleiki Ronaldo varð svo líklega til þess að gestirnir í Persepolis nældu í stig í leiknum því niðurstaðan varð að lokum markalaust jafntefli. Al-Nassr hafði þegar tryggt sér sæti í útsláttarkeppni Meistaradeildarinnar, en liðið situr nú á toppi E-riðils með 13 stig eftir fimm leiki, fimm stigum meira en Persepolis sem situr í öðru sæti.