Inn­sýn í list­ræna veggi á heimilum fólks

Bókin kemur út næstkomandi fimmtudag og verður henni fagnað með útgáfuhófi á veitingastaðnum La Primavera í Marshall húsinu á miðvikudaginn klukkan 17:00.

Í fréttatilkynningu kemur fram að bókin sé sú fyrsta sinnar tegundar hér á landi.

„Hún veitir lesendum innblástur og innsýn í hvernig eigendur verka hafa heimfært listina á heimili sín með ólíkum hætti og hversu sterk áhrif myndlistin hefur í þeirri persónulegu umgjörð.“

Yfir 200 listamenn

Í bókinni bregður fyrir nokkur hundruð listaverkum eftir yfir 200 listamenn og er hvert verk skráð. Þannig gagnast útgáfan einnig sem uppflettirit um samtímamyndlist á Íslandi.

Mörg þeirra myndlistarverka sem prýða bókina hafa aldrei komið fyrir sjónir almennings en verk eftir myndlistarmanninn Sigurð Atla Sigurðsson þekur kápuna.

Myndlist á heimilum er samstarfsverkefni Gunnars Sverrissonar, Höllu Báru Gestsdóttur, Sigurðar Atla og Olgu Lilju Ólafsdóttur.

„Gunnar og Halla Bára hafa gefið út fjölda bóka og tímarita og má þar nefna bækurnar Heimili og bústaðir. Gunnar hefur jafnframt getið sér gott orð sem ljósmyndari og hefur sérhæft sig í ljósmyndun á arkitektúr og innanhússhönnun.

Olga Lilja og Sigurður Atli eiga og reka Y gallery sem er staðsett á gömlu Olís bensínstöðinni í Hamraborg þar sem verk framúrskarandi samtímalistamanna hafa verið til sýnis ásamt því að veita fólki listráðgjöf.

Einnig hefur Y gallery tekið þátt í mörgum verkefnum á sviði myndlistar og má þar nefna Auglýsingahlé Billboard þar sem listamaður tekur yfir fleiri hundruð auglýsingaskjáa og strætóskýla fyrstu daga ársins,“ segir einnig í fréttatilkynningu en verkefnið hlaut aðalverðlaun Myndlistarráðs árið 2023.

Myndlistarsýning á meðan að fólk dælir bensíni

Í samtali við blaðamann segir Olga Lilja að hugmyndin að bókinni hafi kviknað í gegnum störf þeirra allra á sviði myndlistar.

„Við höfum verið þeirrar gæfu aðnjótandi að fá að tengja saman áhugafólk um myndlist við myndlistarmenn og fengið tækifæri til koma inn á mörg alveg hreint mögnuð heimili. 

Heimilin veittu okkur svo mikinn innblástur að okkur langaði til þess að deila gleðinni með fleirum. 

Þetta passar líka vel við það leiðarstef sem við höfum farið eftir á sviði myndlistar; að tengja myndlist við almenning á áhugaverðan og óvenjulegan hátt, samanber að starfrækja gallerí á einni fjölförnustu bensínstöð á höfuðborgarsvæðinu. Þá kemst fólk ekki hjá því að „lenda“ á myndlistarsýningu þegar það dælir bensíni.“