Framleiða allt að hundrað tonn á dag

Laxavinnslan var tekin í notkun í sumar og segir Daníel Jakobsson, framkvæmdastjóri viðskiptaþróunar hjá Artic Fish að níutíu til hundrað tonn af afurðum séu framleiddar á dag.

„Sem samsvarar þá um þrjú hundruð þúsund máltíðum á dag, það er unnið fimm daga vikunnar og full afköst í svona húsi eru um fimmtíu þúsund tonn á ári sem er mögulegt að slátra þá í þessari vinnslu“

Gríðarleg útflutningsverðmæti líka?

„Já, við erum að flytja út fisk fyrir um áttatíu milljónir á dag þegar það er vinnsla í húsinu. Laxakílóið er um þúsund krónur kílóið og framleiðslan er á bilinu níutíu til hundrað tonn á dag.“

Allir velkomnir á opið hús

Húsið var opnað klukkan tólf og er íbúum og öðrum velkomið að skoða vinnsluna til klukkan þrjú.

„Við bjóðum upp á fisk úr Arnarfirði sem hefur verið flakaður og settur í sashimi, svo eru ræður og formleg hátíðarhöld og formlegheit klukkan eitt en að öðru leyti er húsið opið milli klukkan tólf og þrjú í dag og allir velkomnir,“ segir Daníel Jakobsson, framkvæmdastjóri viðskiptaþróunar hjá Artic Fish.“