Sól­ey Margrét gerði at­lögu að HM-gulli í lokatilrauninni

Sóley Margrét endaði með fern verðlaun um hálsinn en rétt missti af heimsmeistaratitlinum. Hér er verið að keppa í kraftlyftingum með útbúnaði.

Þetta er annað árið í röð sem Sóley endar í öðru sæti á heimsmeistaramótinu. Sóley sló líka í gegn á EM í vor þar sem hún varð Evrópumeistari í Danmörku.

Sóley háði harða baráttu við Katrinu Sweatman frá Bretlandi og var keppnin á milli þeirra jöfn og gríðarlega spennandi. Þær keppa í +84 kílóa flokknum.

Í hnébeygju lyfti Sóley mest 277,5 kílóum og með því tryggði hún sér gullverðlaun í greininni en í bekkpressu fékk hún silfurverðlaun fyrir 180 kílóa lyftu.

Úrslitin réðust svo í réttstöðulyftunni þar sem Sóley gerði atlögu að heimsmeistaratitlinum í tilraun sinni við 212,5 kíló en mistókst naumlega eftir hörkubaráttu við þyngdina.

Endaði hún með 200 kílóa lyftu í réttstöðu og fékk bronsverðlaun í þeirri grein.

Samanlagt lyfti Sóley 657,5 kílóum og vann til silfurverðlauna fyrir samanlagðan árangur og kemur því heim hlaðin verðlaunapeningum eða með eitt gull, tvö silfur og eitt brons.