Fiskidagurinn mikli heyrir sögunni til

Þetta kemur fram í fréttatilkynningu frá Fiskideginum mikla. Stjórn samnefnds félags sem haldið hefur utan um hátíðina hefur nú ákveðið að láta staðar numið, samkvæmt tilkynningu. 

Þá segir að eftir mat á stöðu mála og ítarlegar umræður við undirbúning á áður fyrirhuguðum Fiskideginum mikla 2024 hafi verið tekin ákvörðun um að hann yrði ekki haldinn á ný.

„Ákvörðun um að hætta er því tekin með sorg og söknuð í hjörtum þeirra sem að einstakri samkomu hafa staðið alls tuttugu sinnum frá 2001 til 2023,“ segir í tilkynningunni.

Fram kemur í tilkynningunni að ástæðan sé sú að mikil ábyrgð hvíli á stjórn Fiskidagsins, sem skipuleggur samkomuna og heldur henni gangandi í sjálfboðavinnu. „Sú ábyrgð hefur aukist verulega á allra síðustu árum með tilheyrandi kröfum um aukna öryggis- og löggæslu. Öryggisgæsla var mun meiri í ár en sést hefur áður og þar með jókst líka kostnaður við að uppfylla margvíslegar en réttmætar kröfur um öryggismál af ýmsu tagi,“ segir í tilkynningu. 

„Þá ber að nefna að annar kostnaður, svo sem verð á aðföngum af flestu tagi, hefur rokið upp úr öllu valdi,“ segir jafnframt.

Um 600 þúsund gestir frá upphafi

Fiskidagurinn mikli var haldinn árlega frá 2001 til 2019. Eftir þriggja ára COVID-hlé var ákveðið að blása á ný til Fiskidagsins mikla í ágúst 2023.

„Áhugi styrktaraðila, sjálfboðaliða, samstarfsfélaga og landsmanna reyndist síst minni en áður. Samkoman tókst afskaplega vel og greinilegur áhugi fyrir því að við skyldum halda ótrauð áfram sumarið 2024,“ segir í tilkynningunni.

Gróflega má ætla að gestir Fiskidagsins mikla hafi frá upphafi verið um 600 þúsund talsins og um 130 fyrirtæki voru styrktaraðilar Fiskidagsins mikla hverju sinni.

Loks þakkar stjórn Fiskidagsins mikla íbúum Dalvíkurbyggðar, sjálfboðaliðum sem hjálpuðu við undirbúning hátíðarinnar, gestum og fjölskyldum í byggðarlaginu sem opnuðu heimili sín fyrir gestum á súpukvöldum.

Orðrómur varð að veruleika

Júlíus Júlíusson framkvæmdastjóri Fiskidagsins mikla sagði í samtali við fréttastofu í ágúst að hann botnaði ekki í háværum orðrómi um að Fiskidagurinn í ár yrði sá síðasti. Hann sagði aldrei hafa komið til umræðu að hátíðin í ár yrði sú síðasta. Þá sagði hann gaman að geta loksins farið af stað aftur.

Friðrik Ómar bregst við fréttunum

Tónlistarmaðurinn og Dalvíkingurinn Friðrik Ómar, sem ár hvert hefur spilað stórt hlutverk í hátíðinni, hefur brugðist við tíðindunum á Instagram.

„Þakklæti er mér efst í huga nú þegar Fiskidagurinn Mikli heyrir sögunni til. Takk Dalvík fyrir að taka á móti um 600 þúsund gestum á 20 árum. Takk allir listamenn sem fram komu og mitt kæra samstarfsfólk í þessu stórkostlega verkefni. Takk Júlli! Bestur. Takk Samherji fyrir að treysta mér fyrir Fiskidagstónleikunum. Áfram Dalvík,“ skrifar Friðrik við Instagram færslu og lætur myndir af ýmsum fiskidagsminningum fylgja.

Fréttin hefur verið uppfærð.