Verðlaunin voru veitt við hátíðlega athöfn í norska óperu- og balletthúsinu í Ósló í kvöld. Norski rithöfundurinn Maja Lunde afhenti henni verðlaunin, sem eru verðlaunagripurinn Norðurljós og þrjú hundruð þúsund danskar krónur, eða tæpar sex milljónir króna.
Í tilkynningu segir að Rán hljóti verðlaunin fyrir myndabók fulla af sjónrænum sprengikrafti um áhrifin sem villt og óhamin náttúra hefur á fólk. „Mynd og texti fléttast listilega saman í fjöruga og sprenghlægilega sögu um sundurleitan hóp ferðamanna við gosstöðvar. Frásögnin iðar af lífsþrótti og bæði fangar og skopast að hrifningu okkar á öfgafullum náttúrufyrirbærum,“ kom fram í rökstuðningi dómnefndar.
Barna- og unglingabókmenntaverðlaun Norðurlandaráðs voru fyrst veitt árið 2013. Þeim er ætlað að efla og vekja athygli á barna- og unglingabókmenntum á Norðurlöndum. Rán er annar Íslendingurinn til þess að hljóta verðlaunin en rithöfundurinn Arnar Már Arngrímsson hreppti verðlaunin árið 2016 fyrir skáldsöguna Sölvasaga unglings.
