Sumir eru alltaf fúlir á mánu­dögum á meðan aðrir eru góðir alla daga

Mánudagur telst víst líka sá dagur vikunnar sem er hvað óvinsælastur. Margir sérstaklega þreyttir að vakna á morgnana og skapsveiflurnar geta verið eftir því í dag.

Í dag ætlum við hins vegar að velta fyrir okkur í hvernig skapi við erum yfir höfuð. Því það er svo margt sem við getum lært af því að vera meðvituð um það.

Ekki síst ef markmiðið er að vilja vera okkar besta útgáfa.

Tillagan sem við leggjum til núna er að í dag og fram á sunnudag skráum við niður í örstuttu máli í hvernig skapi við erum.

Við byrjum á því að skrifa niður í hvernig skapi við vorum í gær sunnudag: Að morgni, um miðjan dag, um kvöld.

Gerum það sama í fyrramálið með daginn í dag; mánudag. Og koll af kolli.

Athugið að þetta er ekki aðeins verkefni fyrir fólk sem á erfitt með skapið sitt. Fólk sem er að jafnaði í mjög góðu skapi og jákvætt, getur líka lært af því.

Vegna þess að það sem gerist eftir vikuna er þrennt:

Við eigum auðvelt með að sjá hvað triggerar okkur ef skapið er ekki nógu gott. Oft eru þetta hlutir sem við vitum nú þegar. Til dæmis ef við erum vansvefta, svöng eða stressuð. En með því að skrá heiðarlega niður hvernig skap-vikan okkar verður, sjáum við enn skýrar hverjir triggerarnir eru.

Við verðum meðvitaðri um það hvernig okkur líður hverja stund. Sem er af hinu góða. Að vera meðvituð um það hvernig okkur líður leiðir til þess að við erum líklegri til að einbeita okkur enn betur að því að líða vel og vera okkar besta útgáfa. Eða gerum okkur grein fyrir því að við verðum að fá aðstoð fagaðila og þá getur skap-vikuskráningin líka hjálpað til.

Síðast en ekki síst gerist það oftast að við ósjálfrátt förum í umbætur. Því þegar að hugurinn verður upptekinn af því að vakta skapið okkar, virðist það gerast ósjálfrátt að undirmeðvitundin fer að vinna í því að við náum sem bestri útkomu. Förum jafnvel fyrr að sofa því okkur langar ekki til að skrifa skrá niður að við höfum verið frekar pirruð við krakkana morguninn eftir og svo framvegis.

Triggerar sem eru nokkuð algengir, til viðbótar við að vera vansvefta, of svöng eða stressuð, eru atriði eins og:

Við erum að láta einhvern í kringum okkur fara í taugarnar á okkur, stuða okkur, pirra okkur. Þetta getur verið einstaklingur í fjölskyldunni eða í vinnunni.

Sumir verða leiðir eða pirraðir yfir fréttum

Veðrið getur haft áhrif á skapið okkar

Hormónabreytingar, breytingaskeið. Á einnig við um karlmenn

Áfengi eða vímuefnaneysla

Lélegt matarræði

Hreyfingarleysi

Til viðbótar geta verið alvarlegri þættir eins og þunglyndi, kvíði, líkamlegir verkir og svo framvegis. Ef svo er, er mikilvægt að leita til læknis.

En við erum alls ekki búin hér….

Því markmið vikunnar er alls ekkert aðeins það að læra að þekkja hvað triggerar pirring í okkur eða hvenær við virðumst stuðast, verða fúl og leiðinleg.

Þvert á móti er ætlunin líka að læra betur á það hvað triggerar okkur í besta skapið.

Eftir vikuna er því mjög gott að horfa á skap-skráninguna okkar og reyna að lesa úr því hvað yfirlitið er að kenna okkur með bestu dagana og besta skapið.

Hvað einkenndi þessa daga?

Hvað var öðruvísi hjá þér þá?

Hvers vegna varstu í svona góðu skapi?

Það er svo sannarlega til mikils að vinna því staðreyndin er sú að okkur langar öllum til að líða sem best sem oftast.

Þá er þessi skapskráning ákveðin heiðarleikaspurning til okkar sjálfra. Dæmi: Erum við í góðu skapi í vinnunni en oftar pirruð heima? Og ef já, er það virkilega það sem við viljum eða teljum eðlilegt? 

Þannig að jú, verkefninu geta fylgt áskoranir og vangaveltur sem við megum alveg hugsa svolítið um hvað við viljum gera með. Að gefa okkur sjálfum samt smá tíma er hins vegar alltaf af því góða því sjálfið okkar á það til að verða svolítið útundan. Sjálfið sem þó ætti alltaf að fá góðan tíma hjá okkur daglega.

Að prófa að skrá skapið okkar niður í eina viku niður gæti verið leið sem vísar okkur veginn að einhverju enn skemmtilegra átaki eða leið sem við teldum vera góða fyrir okkur sjálf. Hvers vegna ekki að prófa?