Ármann felldi meistarana

Hjörvar Ólafsson skrifar 14. október 2023 22:25

Ármann er eina liðið til að sigra Dusty á tímabilinu.

Leikurinn fór fram á Ancient og hófu NOCCO Dusty-menn leikinn í vörn. Dusty voru enn taplausir í deildinni fyrir leik en Ármann byrjuðu leikinn þó mun betur og tóku fyrstu 6 loturnar með þó nokkrum yfirburðum.

Dusty sigraði þá eina lotu en Ármann héldu áfram nánast gallalausum hálfleik sínum og komu stöðunni í 1-8 með yfirveguðu spili. Dusty virtust ekki hafa nein svör framan af leik en náðu þó að klóra í bakkann fyrir hálfleik og sigruðu nokkrar lotur.

Staðan í hálfleik: 5-10

Skammbyssulota seinni hálfleiks var sigruð af leikmönnum Ármanns í vörn og hófu þeir seinni hálfleik eins og þann fyrri. Góð ráð voru þá dýr fyrir Dusty, en þeir ákváðu að kaupa byssur í stöðunni 5-12 og náðu að sigra nokkrar lotur til baka. Staðan var 8-13 í 22. lotu þegar bæði tæmdu bankann til að kaupa byssur en Dusty sigruðu lotuna, staðan þá 9-13 og lítill peningur eftir hjá Ármanni.

Dusty héldu áfram að minnka muninn og komust í 11-14 en Kraken, leikmaður Ármanns sá til þess að lið sitt komst á úrslitastig með hugarleikfimi gegn StebbaCoco, leikmanni Dusty. Ármann fundu þó ekki lokahöggið og Dusty komust í stöðuna 13-15 en Ármann sigruðu óvænta lotu þar sem þeir keyptu ekki staka byssu og unnu því leikinn.

Lokatölur: 13-16

Fyrsta tap Dusty er því orðið staðreynd og Ármann eru nú komnir á topp stigatöflunnar með 10 stig eftir frábæra frammistöðu gegn deildarmeisturunum í Dusty.