Jökull framlengir til 2027

Nýr samningur Jökuls gildir til ársins 2027 en hann tók við liðinu fyrr í sumar eftir að Ágúst Gylfason var látinn fara. Spilamennska Stjörnunnar undir Jökli vakti mikla athygli í sumar og því eru þetta gleðifréttir í Garðabænum.

„Ég er þakklátur og spenntur að skrifa undir nýjan samning við Stjörnuna. Við erum að koma úr flottu tímabili en nú þurfum við að gera betur og gera meira og ég hlakka mikið til að byrja undirbúningstímabil þar sem við munum leggja enn meira á okkur en við höfum áður gert,“ sagði Jökull í viðtali á samfélagsmiðlum Stjörnunnar eftir að hafa skrifað undir samninginn.