Ein­hverfa og hinseginleiki í for­grunni

Eva Ágústa er á einhverfurófi og er trans. Hún hefur séð hvernig minnihlutahópar eiga til að gleymast í ljósmyndun og hefur einblínt á þær hliðar.

„Í ljósmynduninni skiptir mig mestu máli að segja sögur og skapa. Ég var til dæmis með sýningu í vor sem fjallaði um hinsegin einhverfa einstaklinga. Við sem erum á rófinu sjáum hlutina oft öðruvísi og dýpri. Þeir birtast okkur oft myndrænt og þetta snýst oft ekki um það hvað við lesum heldur hvernig við skynjum,“ segir Eva í samtali við blaðamann. 

Eva byrjaði að æfa sig í ljósmyndun árið 2004. Hún lauk svo námi úr Tækniskólanum í Reykjavík jólin 2009 og sveinsprófi í ljósmyndun haustið 2011. 

„Ég var að falla í framhaldsskóla og þurfti að taka mér pásu til að finna hvað mig langaði að gera.  Ég prófaði ljósmyndun og þá var ekki aftur snúið, síðan þá hefur þetta alltaf verið það sem ég hef gaman að.  Mér leið lengi vel eins og ég væri alltaf nýliði í þessu og ég yrði kannski ekki eins flott og hinir. En svo gengur mér rosa vel í dag og það er ótrúlega skemmtilegt. “

Á fyrirlestrinum mun Eva sýna frá verkefnum sínum í tengslum við hinseginleikann og einhverfu ásamt öðrum verkefnum undanfarin ár.

Ljósmyndarafélag Íslands hefur staðið fyrir fagkvöldum einu sinni í mánuði fyrir áhugasama ljósmyndara og unnendur ljósmynda og annan miðvikudag hvers mánaðar yfir vetrartímann. Fyrirlesturinn fer fram í Húsi atvinnulífsins, Borgartúni 35, á morgun klukkan 20:00.