Segir að meira en helmingur leik­manna deildarinnar reyki marijúana að stað­aldri

Mikið vatn hefur runnið til sjávar síðan NFL-leikmaðurinn Travis Kelce var gripinn fyrir að reykja marijúana og dæmdur í leikbann. Þá var árið 2009, Kelce var í háskóla og marijúana var ólöglegt í næstum öllum fylkjum Bandaríkjanna.

Nú eru marijúanareykingar leyfðar í 23 af 50 ríkjum landsins og mjög algengar á meðal leikmanna NFL-deildarinnar. Kelce hefur verið einn af bestu innherjum deildarinnar síðustu árin og hann heldur því fram að 50-80% leikmanna deildarinnar noti marijúana að staðaldri.

Nýjar reglur hvað varðar marijúanareykingar tóku gildi í deildinni árið 2021. Nú eru leikmenn aðeins prófaðir á tveggja vikna tímabili áður en undirbúningstímabilið byrjar á sumrin.

„Svo lengi sem þú hættir um miðjan júní þá er þetta lítið mál. Margir hætta viku áður en prófin eru tekin og sleppa. Þar sem allir eru úti í hitanum og svitna á æfingum þá er enginn sem fellur í þessum prófum. Nú til dags er nánast enginn sem fær refsingu útaf þessu,“ segir Kelce í viðtali við Vanity Fair.

Áður en nýju reglurnar tóku gildi voru leikmenn, sem greindust með marijúna í lyfjaprófum, dæmdir í leikbann. Nú fá þeir hins vegar aðeins sektir. Í NBA-deildinni í körfubolta eru engin próf tekin yfirhöfuð.