Lengsta lands­liðs­þjálfara­leitin síðan langa sumarið hans Bog­dans

Íslenska landsliðið er reyndar búið að spila fjóra landsleiki og tryggja sig inn á Evrópumótið í millitíðinni en það gerði það undir stjórn þeirra Gunnars Magnússonar og Ágústs Þórs Jóhannssonar sem tóku við liðinu tímabundið.

Eftir stendur að Handknattleiksambandið er enn að leita að næsta framtíðarþjálfara íslenska landsliðsins.

Það er reyndar sterkur orðrómur um að sá útvaldi sé Snorri Steinn Guðjónsson en það hefur ekki verið staðfest af þeim sem ráða.

Það er vitað að viðkomandi þjálfari mun taka við gríðarlega spennandi liði sem hefur allt til alls til að gera góða hluti á næstu árum. HSÍ vill halda leit sinni á bak við tjöldin en á þessum tíma hafa menn verið að hlera að viðræður við nokkra aðila, innlenda sem erlenda, hafa verið í gangi.

Fréttirnir hafa hins vegar meira snúist um það hvaða erlendir þjálfarar hafa gefið starfið frá sér auk þess að Dagur Sigurðsson þótti vinnubrögð sambandsins ekki boðleg og sagðist ekki getað unnið með þeim mönnum sem stýra HSÍ-skútunni í dag.

Smám saman hefur því fækkað á óskalistanum og því stendur eftir nafn Snorra Steins Guðjónssonar með stórum stöfum.

Þetta er þegar orðin lengsta bið eftir nýjum landsliðsþjálfara í fjóra áratugi eða síðan að það tók heilt sumar að ganga frá ráðningu Bogdan Kowalczyk sumarið 1983.

Reyndar má deila um hvort ráðning Bogdans hafi í raun aðeins tekið nokkra daga eða allt sumarið því stjórnin sagði fjölmiðlum frá viðræðum sínum við Bogdan um leið og það kom í ljós að Hilmar Björnsson yrði ekki áfram. Það er því hægt að segja að þetta sé lengsta landsliðsþjálfaraleitin.

Opinberlega kom það í ljós að Hilmar yrði ekki með liðið um leið og viðræður hófust við Bogdan í lok apríl 1983 og í júlímánuði sama ár fjölluðu fjölmiðlar að aðeins formsatriði stæðu í vegi fyrir að Bogdan tæki við.

Bogdan þurfti að ganga frá sínum málum í Póllandi áður en hann gat endanlega tekið við íslenska liðinu en það var þó öllum ljóst að Bogdan yrði þjálfari liðsins. Hann átti síðan eftir að stýra íslenska liðinu í næstum því sjö ár með frábærum árangri.

Hér fyrir neðan má sjá lista yfir lengstu bið eftir ráðningu landsliðsþjálfara það er frá því að það var tilkynnt að forverinn sé formlega hættur þar til að ráðning nýs þjálfara er staðfest.