Gefa hvorugt eftir í deilunni og verkföll yfirvofandi

Í heildina munu um 970 félagsmenn BSRB í Kópavogi, Mosfellsbæ, Garðabæ og á Seltjarnarnesi leggja niður störf eftir rúmar tvær vikur. Mikil þátttaka var í atkvæðagreiðslu ellefu aðildarfélaga sem lauk á hádegi í dag, kjörsókn var frá 66 til 86 prósent og 92 til 100 prósent samþykktu verkfallsboðunina.

Fyrsta lota verkfallsins fer fram 15. og 16 maí og nær til starfsfólks leikskóla, grunnskóla og félagsheimila. Atkvæðagreiðsla stendur nú yfir um sambærileg verkföll í sex öðrum sveitarfélögum en ef af því verður munu verkfallsaðgerðir ná til ríflega 1500 manns í heildina. Ekki er útilokað að víðtækari aðgerðir verði boðaðar.

Aðgerðirnar koma í kjölfar þess að viðræður við Samband íslenskra sveitarfélaga sigldu í strand en BSRB krafðist sömu launahækkana og félagsfólk Starfsgreinasambandsins fékk frá áramótum, með afturvirkni frá fyrsta janúar.

„Þeim ber skylda sem atvinnurekendum, og sveitarfélög eru líka atvinnurekendur, til þess að tryggja jöfn laun fyrir jafn verðmæt störf og í þessu tilviki eigum við félagsfólk sem er í nákvæmlega sömu störfum, og sambærilegum störfum, og félagsfólk í öðrum stéttarfélögum en það munar þarna 25 prósent á launahækkunum á ársgrundvelli,“ segir Sonja Ýr Þorbergsdóttir, formaður BSRB.

Deilan snúist um samning sem er liðinn

Ellisif Tinna Víðisdóttir, lögfræðingur á kjarasviði Sambands íslenskra sveitarfélaga, bendir þó á að BSRB hafi hafnað samningnum sem SGS fékk og þess í stað samið um styttri gildistíma, til 31. mars í staðinn fyrir út september. BSRB þurfi einfaldlega að taka ábyrgð á þeirri ákvörðun.

„Við teljum okkur vera að bjóða mjög góðan samning. Þetta er samningur með sambærilega launatöflu og önnur félög hafa nú þegar gengið að hjá okkur. Þetta stendur þeim að sjálfsögðu til boða og hefur gert núna í töluverðan tíma. Þessi deila núna snýst um samning sem er liðinn og að okkar mati þá hefur Samband íslenskra sveitarfélaga og sveitarfélögin efnt þann samning að fullu,“ segir Ellisif.

Þau geti ekki orðið við kröfum BSRB með afturvirkni, enda hafi annar samningi verið í gildi frá janúar til mars.

„Þegar gildistíma eins samnings lýkur og kjaraviðræður standa kannski um langan tíma, þá er talað um afturvirkni frá því að síðasta samningi lauk, til þess að brúa það bil þannig menn séu ekki samningslausir. En afturvirkni inn á tímabil gildandi samnings, það erum við ekki að fara í. Þá værir þú með tvo samninga í gildi,“ segir Ellisif en hún hvetur BSRB til að leita til Félagsdóms til að leysa úr málinu.

Engin afsláttur gefinn af kröfum

Sonja Ýr gefur lítið fyrir rök sambandsins og segir þau ekki standast skoðun, auk þess sem málið ætti heldur heima hjá Héraðsdómi en fullyrðingar sambandsins endurspegli mögulega ákveðið þekkingaleysi.

„Þau hafa vísað í það að það séu mismunandi gildistímar á þeim samningum sem við erum að vísa til að misrétti leiði af. Við höfum bent á það að samkvæmt samningsrétti þá trompar nýr samningur þann eldri, þannig það er ekkert því til fyrirstöðu að fara afturvirkt og það eru fjölmörg dæmi fyrir því, til dæmis voru nýlegir kjarasamningar sem Samtök atvinnulífsins hafa gert við eitt okkar aðildarfélaga,“ segir Sonja.

Þau hafi ákveðið að hafna gildistíma samningsins þar sem kjaradeilan hafi einnig verið í hnút á sínum tíma og flestir ákveðið að gera skammtímasamning. Þau gefi nú engan afslátt af sínum kröfum en Sonja bindur vonir við að sveitarfélögin sjái að sér og að ekki þurfi að leita lengra.

„Ef það leysist ekki úr kjaradeilunni þá förum við auðvitað með þetta fyrir dómstóla en hins vegar tekur það mjög langan tíma og við höfum áhyggjur af því að sveitarfélögin séu að reyna að notfæra sér þennan aðstöðumun sem er á milli,“ segir Sonja

„Þess vegna er eina leiðin að ganga frá kjarasamningi og leiðrétta þetta hratt og vel. Fólkið okkar er ekki búið að fá launahækkanir síðan í apríl á síðasta ári. í tíu prósent verðbólgu. Þetta er að uppistöðu til fólk á mjög lágum launum og konur, þannig það þarf bara að leiðrétta þetta,“ segir hún enn fremur.

Að mati sambandsins er það ekki svo einfalt, afturvirkni eða mögulegar eingreiðslur sem einnig hafa komið til tals séu ekki á borðinu.

„Ef að við færum að greiða eingreiðslu, og það eru yfir sex þúsund félagsmenn BSRB hjá okkur, þá eiga allir aðrir líka rétt á þeirri eingreiðslu. Þannig að málið er risastórt fyrir sveitarfélögin. Við teljum okkur, svo ég ítreki það, hafa efnt síðasta samning alveg að fullu og það liggur á borðinu samningur sem við erum tilbúin til að ganga að strax,“ segir Ellisif og bætir við að lausn sé ekki í sjónmáli að svo stöddu.

BSRB og Samband íslenskra sveitarfélaga munu næst koma saman á fundi hjá ríkissáttasemjara á þriðjudag.