„Hann er orkumikill og hvetjandi“

„Hann er orkumikill og hvetjandi. Hann á eftir að fá menn upp á tærnar og láta þá gera réttu hlutina. Satt að segja veit ég ekki hvernig hann mun nálgast þetta verkefni en ég veit að hann á eftir að fá menn til gera það sem hann vill gera.“

Það er greinilegt að Hólmar hafi notið þess að spila undir stjórn Hareide og lýsir þeim norska á jákvæðan hátt.

„Hann er enginn harðstjóri en menn munu vilja hlaupa fyrir hann. Hann er líka léttur inn á milli og það er hægt að grínast og hægt að ræða við hann. Ég held að þetta sé heillaráðning fyrir KSÍ,“ sagði Hólmar.

Það á ennþá eftir að koma í ljós hvort að Hareide breyti um starfslið eða haldi þeim sem fyrir eru. Jóhannes Karl Guðjónsson var aðstoðarþjálfari Arnars Þórs Viðarsonar, fyrrverandi landsliðsþjálfara, en hélt starfi sínu þegar sá síðarnefndi var látinn fara.

„Þegar hann kom inn í Rosenborg þá tók hann engan með sér. Hann virðist vera öruggur að koma inn í ný teymi. Það gæti alveg verið að hann haldi honum,“ sagði Hólmar.

Hólmar segir að það sé margt líkt með Hareide og Lars Lagerbäck, fyrrverandi landsliðsþjálfara.

„Hann svipar til Lars á ákveðnum sviðum þó hann sé aðeins öðruvísi karakter. Ég held að með íslenska landsliðið þá skiptir miklu máli að byggja þetta upp á varnarleik þar sem allir frá fremsta manni verjast og gera það vel.“

Hareide stýrði danska landsliðinu með frábærum árangri frá 2016-2020 í 40 leikjum, vann 28 leiki, gerði 15 jafntefli og tapaði einungis 5 leikjum. Á heimsmeistaramótinu 2018 datt Danmörk út undir hans stjórn í 16-liða úrslitum gegn Króatíu í vítaspyrnukeppni. Á móti sem Króatía átti eftir að fara alla leið í úrslit. Í riðlinum hafði liðið gert jafntefli gegn Frakklandi og Ástralíu en unnið Perú. Hann kom liðinu á Evrópumótið 2020 en var látinn fara fyrir mótið.

„Leikmenn innan danska liðsins voru gríðarlega ánægðir með hann. Þeir voru mjög hissa þegar hann fór þaðan og söknuðu hans mikið. Það var mikil ánægja með hans störf þar,“ sagði Hólmar.

Hareide stýrði norska landsliðinu í 58 leikjum á árunum 2003-2008, vann 24 leiki, gerði 18 jafntefli og tapaði 16 leikjum.

Á félagsliðaferlinum hefur hann unnið deildina í Danmörku með Bröndby, í Noregi með Rosenborg og tvisvar í Svíþjóð, annarsvegar með Malmö FF og Helsingborg. Einnig hefur hann orðið bikarmeistari í Svíþjóð með Helsingborg og tvisvar í Noregi, með Rosenborg og Molde.

Langur þjálfaraferill

Þjálfaraferill hans hófst fyrir 37 árum sem spilandi aðstoðarþjálfari Molde árið 1986. Í kjölfarið tók hann við sem aðalþjálfari liðsins í byrjun árs 1990 og hætti ári seinna. Hareide tók síðan á ný við Molde árið 1993 en stýrði liðinu þá í fjögur ár.

Hareide hélt næst til Helginsborg og stýrði félaginu í tvö tímabil en tók síðan við Bröndby og var þar til ársins 2001.

Norska stórliðið Rosenborg var næsti áfangastaður Hareide, hann tók við liðinu árið 2003 en staldraði stutt við og var það sama ár ráðinn þjálfari norska landsliðsins. Hareide stýrði Noregi allt til ársins 2008 þegar hann tók við Örgryte til skamms tíma en árið 2009 var hann ráðinn þjálfari Viking í Noregi og var við stjórnvölinn þar í þrjú tímabil.

Árið 2012 var Hareide síðan mættur aftur til Helsingborg en hann tók við liðinu um mitt sumar og stýrði því út tímabilið. 

Malmö var næsti áfangastaður Hareide en þangað kom hann árið 2014 og stýrði liðinu í tvö ár. Hann vann sænska meistaratitilinn í tvígang og kom liðinu bæði árin í riðlakeppni Meistaradeildar Evrópu með Kára Árnason í liðinu síðara árið. 

Eftir að hafa stýrt danska landsliðinu eins og fram kom hér að ofan tók hann aftur við við Rosenborg og stýrði liðinu tímabilin 2020 og 2021 áður en hann lét af störfum.

Hann var svo kallaður inn til Malmö á miðju síðasta tímabili eftir að Milos Milojevic var rekinn en lét af störfum þar í desember síðastliðnum og hefur verið án starfs síðan þá.