Þrír Íslendingar í liði umferðarinnar í Danmörku

Þetta eru þeir Sævar Atli Magnússon og Kolbeinn Finnsson, leikmenn Lyngby, og Hákon Arnar Haraldsson sem spilar með FC Kaupmannahöfn.

Lyngby, sem Freyr Alexandersson stýrir, vann sinn annan leik í röð þegar liðið sigraði Midtjylland, 1-3, á útivelli. 

Sævar Atli skoraði fyrstu tvö mörk Lyngby, annað þeirra eftir sendingu frá Kolbeini. Alfreð Finnbogason lagði svo þriðja mark heimamanna upp fyrir Christian Gytkjær sem er einnig í liði 21. umferðar dönsku úrvalsdeildarinnar ásamt miðverðinum Lucas Boel Hey. Fjórir af ellefu í úrvalsliðinu koma því úr röðum Lyngby.

Lyngby er enn á botni dönsku úrvalsdeildarinnar, nú með fimmtán stig líkt og Álaborg.

Hákon skoraði eitt mark og lagði upp annað er FCK vann öruggan sigur á Horsens á útivelli, 1-4. Skagamaðurinn hefur alls skorað þrjú mörk og gefið þrjár stoðsendingar í tuttugu deildarleikjum á tímabilinu.

FCK er í 2. sæti deildarinnar með 39 stig, einu stigi á eftir toppliði Nordsjælland.