Benedikt segir Laufeyju skreyta sig stolnum fjöðrum

Þegar starfið var auglýst laust til umsóknar fylgdi það sögunni að skipað yrði í það 18. febrúar. Ekkert bólar hins vegar á skipan nýs forstjóra og ríkir mikil eftirvænting innan kvikmyndagerans, hver verður ráðinn en Laufey hefur verið forstöðumaður undanfarin tuttugu ár.

Eftir því sem Vísir kemst næst hefur hæfisnefnd tekið sérstaklega viðtal við hluta sjö af fimmtán umsækjendum og í framhaldinu hefur ráðherra rætt svo við hluta af þeim hópi. Samkvæmt heimildum eru einkum fjórir sem koma til greina, þau Gísli Snær Erlingsson fyrrverandi skólastjóri London Film School, Pálmi Gunnarsson fyrrverandi dagskrárstjóri, Hrönn Sveinsdóttir forstöðumaður Bíó Paradís og Sigurrós Hilmarsdóttir, framleiðslustjóri Kvikmyndamiðstöðvar.

Samkvæmt heimildum Vísis er niðurstöðu að vænta nú síðdegis.

Uppfært: Gísli Snær heufr verið skipaður forstöðumaður Kvikmyndamiðstöðvar.

En Benedikt Erlingsson styttir kvikmyndagerðarmönnum biðina með því að leggja út af viðtali við Laufey sem birtist í Nordic Film and TV News. Hann vitnar í niðurlag þess viðtals þar sem hún er spurð hvað standi uppúr, og til hvers hún hugsi með sem sérstaks ánægjuefnis?

Hinar stolnu fjaðrir

Laufey segir margs að minnast og erfitt að velja. En það hafi verið uppgangur í greininni að undanförnu og hún heppinn að hafa starfað með miklu hæfileikafólki. Það hafi tekið tíma fyrir Ísland að vinna kvikmyndaverðlaun Norðurlandaráðs, en það hafi tekist 2014 með Hross í oss.

„Ég verð að nota þennan vettvang til að halda því til haga að Laufey Guðjónsdóttir veðjaði EKKI á Hross í oss á sínum tíma. Því hún veitti okkur ekki fullan framleiðslustyrk. Við fengum svona “mini” styrk.“

Benedikt segir að ástæðan sem honum var gefin á sínum tíma hafi verið sú að hann væri byrjandi.

„Gott og vel, en á sama ári veitti hún öðrum byrjanda ríflegan fullan styrk, og svo öll næstu ár á eftir veitti hún byrjendum fulla framleiðslustyrki fyrir sínar fyrstu myndir og er það vel.

En þessi litli stuðningur við Hrossið varð mér ekki sársaukalaus og af því að ég var með getulausan framleiðanda mér við hlið, þá tók ég lán, með veði í húsi mínu og safnaði fjárfestum. Það voru vinir, fjölskylda og velunnarar sem hlupu undir bagga og þannig náði ég að safna því sem upp á vantaði. Þetta er svona gamalkunnugt stef í íslenskri kvikmyndagerð.“

Skálað við Laufey rjóða í kinnum

En svo vann Benedikt til Norðurlandaverðlauna fyrir „Hrossið“ fyrstur íslenskra kvikmyndagerðarmanna.

„Eins og Laufey skreytir sig nú með. Það kom mér því á óvart þegar ég leitaði svo til Laufeyjar árið 2016 með næstu mynd: „Kona fer í stríð“. Þá var okkur einfaldlega hafnað. Okkur tókst þó að kría út úr henni vilyrði fyrir næsta ár 2017, en þá aftur aðeins “mini” styrk og í þetta sinn án skýringa.“

Kona fer í stríð vann svo eins og Hrossið til fjölda verðlauna, meðal annarra Norðurlandaverðlaunanna.

„Og hef ég oft skálað við Laufeyju rjóða í kinnum á hátíðum þar sem þessum íslensku myndum hefur verið hampað.“

Benedikt vill ekki gera lítið úr því að forstöðumaður taki ákvarðanir, það eigi hann vitaskuld að gera en segir þá: „Ég óska þess að nýr forstöðumaður innleiði meiri heiðarleika og gegnsæi og þori að standa með ákvörðunum sínum.“