Kvöldfréttir Stöðvar 2

Framkvæmdastjóri Samtaka atvinnulífsins segir deiluaðila og nýskipaðan ríkissáttasemjara í kjaradeilu samtakanna og Eflingar aðeins hafa örfáa daga til að ná samningum áður en samfélagið meira og minna lamast. Vinnumarkaðsráðherra skipaði í dag Ástráð Haraldsson héraðsdómara í embætti sérstaks ríkissáttasemjara.

Við fjöllum nánar um málið og ræðum við formann Eflingar í beinni í kvöldfréttum Stöðvar 2. Þá förum við einnig yfir áhrif verkfallsins en forstjóri Icelandair segir að flugsamgöngur lamist að óbreyttu í næstu viku og á hjúkrunarheimilum hefur starfsfólk áhyggjur af lyfjaskorti.

Við hittum einnig björgunarsveitarfólk sem hefur verið að störfum í Tyrklandi síðustu daga og fylgjumst með tilfinningaríkum endurfundum sem áttu sér stað í Leifsstöð í dag – þegar flóttakona frá Sómalíu hitti börnin sín á ný eftir fjögurra ára aðskilnað.

Þetta og margt fleira á samtengdum rásum Bylgjunnar og Stöðvar 2 klukkan 18:30.