Þétt raf­í­þrótta­dag­skrá alla helgina er úr­slitin ráðast á Reykja­víkur­leikunum

Búast má við mikilli spennu í greinunum fimm, en keppt verður í Super Smash Bros. Ultimate, Valorant, League of Legends, F1 22 og Gran Tourismo 7.

Dagskráin hefst á slaginu klukkan 13:00 á Stöð 2 eSport þegar bestu Super Smash Bros spilarar landsins mæta til leiks áður en úrslitin í Valorant fara fram klukkan 17:00.

Ólíkt fyrri tímabilum Valorant deildanna var í þetta sinn eingöngu spiluð útsláttarkeppni með tvöföldum útslætti, en ekki voru spilaðir riðlar þar á undan.

Dusty var ósigrað í opnum flokki úrvalsdeildanna og komst inn í úrslit gegnum efra leikjatré, en í kvennaflokki var það KRAFLA sem tryggði sér slíkt hið sama. Mun Dusty mæta 354 Esports í úrslitum og KRAFLA liðinu ATX, en þau lið unnu sér leið inn í úrslit úr neðra leikjatré.

Dusty vann tvær viðureignir, annars vegar gegn 354 Esports og hins vegar gegn Breiðablik. 354 Esports töpuðu fyrstu viðureign sinni gegn Dusty en unnu svo bæði Jötunn og Breiðablik til að tryggja sér sæti í úrslitum. 354 fær því tækifæri til að jafna metin í úrslitaviðureigninni.

Í kvennaflokki vann KRAFLA sínar fyrstu tvær viðureignir gegn Jötunn Valkyrjur og ATX. ATX unnu hinsvegar fyrstu viðureign sína gegn 354 BroFlakez og svo í kjölfar tapsins gegn KRÖFLU unnu þær Jötunn Valkyrjur í undanúrslitum til að koma sér að lokum í úrslitin. ATX fær því einnig annað tækifæri til að bæta fyrir fyrri ósigur sinn.

Ekki er dagskráin síðri á morgun þegar úrslitin ráðast í þremur greinum. Bein útsending frá einum vinsælasta keppnistölvuleik heims, League of Legends, hefst klukkan 13:00 áður en ökumenn í F1 22 fara af stað klukkan 19:00. Frá klukkan 20:30 verður svo keppt í Gran Tourismo 7.

Eins og áður segir verður veislan í beinni útsendingu á Stöð 2 eSport alla helgina, en einnig geta áhugasamir gert sér ferð á þjóðarleikvang Íslands í rafíþróttum, Arena, og gert sér glaðan dag.