Efling í leit að ófriði þegar friður er í boði

Halldór Benjamín Þorbergsson, framkvæmdastjóri SA, var gestur í Reykjavík síðdegis á Bylgjunni í dag. Þar ræddi hann um miðlunartillögu ríkissáttasemjara í deilu SA og Eflingar, stefnu samtakanna á hendur Eflingar og fleira. Hann segir það liggja fyrir að ríkissáttasemjari hafi boðað bæði samninganefndir Eflingar og SA til skrafs og ráðagerða áður en hann lagði tillöguna fram. 

„Þar að auki hef ég lagt vel við hlustir undanfarna daga, og hef líka lesið mér mikið til í gegn um árin, ég lagði við hlustir, þegar Ásmundur Stefánsson sem margir kalla æðsta prest íslenskrar verkalýðshreyfingar, fyrrverandi forseta ASÍ og ríkissáttasemjara, þar sem hann tætti þennan málflutning í sig. Þannig að ekkert af honum stendur eftir eftir að hann hefur rætt um þessi mál út frá sínu sjónarhorni,“ segir Halldór.  

Forystan á harðahlaupum undan félagsfólki

Hann segist horfa á alla taktík og aðgerðir Eflingar með þeim hætti að forystan sé á harðahlaupum undan félagsfólki sínu. Með stjórnsýslukæru vegna miðlunartillögunnar séu þau einungis að búa til tímafrest til að koma í veg fyrir að félagsmenn geti greitt atkvæði um tillöguna. 

Þegar tillagan var lagð fram sagðist Halldór ekki vera sáttur með hana og mat sem svo að staða SA í deilunni væri mjög sterk. Hann segist hafa viljað takast á við Eflingu eftir þeim leiðum sem vinnulöggjöfin leyfir. Þrátt fyrir það hafi hann skilað inn atkvæðaskrá samtakanna, annað en Efling. 

„Mér finnst allar aðgerðir Eflingar, allur bragur á þeirra kjaraviðræðum benda til þess að þau séu í leit að ófriði þegar friður er í boði. Mikill meirihluti þjóðarinnar hefur undirritað kjarasamninga við SA og tryggt góðan frið á vinnumarkaði,“ segir Halldór. 

Stefnan þingfest fyrir Félagsdómi í dag

Stefna SA á hendur Eflingar var þingfest hjá Félagsdómi klukkan þrjú í dag. Stefnan sýnst um það að SA vilja fá úr því skorið, og halda því fram, að verkfallsboðun Eflingar sé ólögmæt. Í gærkvöldi var greint frá því að boðunin hafi verið samþykkt og hefst vinnustöðvun hjá starfsmönnum Eflingar hjá Íslandshótelum þann 7. febrúar næstkomandi. 

„[Verkfallsboðunin] sé ólögmæt á þeim grunni að ríkissáttasemjari hafi lagt fram miðlunartillögu sem Efling er með ólögmætum hætti að koma í veg fyrir að kosið verði um. Þar af leiðandi teljum við að þessi verkfallsboðun sé ólögmæt og að Félagsdómur muni úrskurða samfélaginu og SA í vil,“ segir Halldór. 

Býstu við að það verði af verkfallinu?

„Það er alltaf erfitt að spá, sérstaklega um framtíðina. Sérstaklega þegar um er að ræða mál sem eru fyrir dómstólum. SA eru fullkomlega ábyrgur aðili í þessu samfélagi. Við erum ekki að eyða tíma dómstóla nema við teljum að við séum í ríkum rétti og það séu verulegar líkur á að dómur muni falla okkur í hag. Þannig ég vona það besta en þegar kemur að samskiptum við forystu Eflingar þá óttast ég hið versta og útiloka ekkert,“ segir Halldór.