Sólveig Anna vonar að SA komist niður á jörðina

Efling boðaði í morgun til atkvæðagreiðslu um verkfall hjá starfsmönnum félagsins hjá Samskipum, Olíudreifingu og Skeljungi ásamt hjá starfsmönnum Berjaya hótelanna og Reykjavík Edition. Samtök atvinnulífsins ætla að stefna Eflingu til Félagsdóms fyrir boðun verkfalls hjá sjö hótelum Íslandshótela sem samþykkt var í gær.

Eftir að niðurstaða lá fyrir um samþykki starfsmanna sjö hótela Íslandshótela á verkfallsboðun lá fyrir í gærkvöldi kom samninganefnd Eflingar saman og samþykkti víðtækari aðgerðir. Þær ná til allra bílstjóra hjá Samskipum, Olíudreifingu og Skeljungi og starfsfólks Berjaya hótelanna, eða gömlu Icelandair hótelanna, og Edition hótelsins. Atkvæðagreiðsla um þessar aðgerðir á að hefjast á föstudag og ljúka hinn 7. febrúar, sama dag og verkföllin á Íslandshótelunum eiga að hefjast.

Þann dag á Efling einnig að skila Hérðasdómi Reykjavíkur greinargerð vegna málshöfðunar ríkissáttasemjara til að fá kjörskrá Eflingar afhenta í tenglsum við atkvæðagreiðslu um miðlunartillögu hans í deilu félagsins við Samtök atvinnulífsins.

Ný verkfallsboðun mun víðtækari

Sólveig Anna Jónsdóttir formaður Eflingar segir nýju verkfallsboðunina ná til um 500 starfsmanna hótelanna og um 70 bílstjóra Samskipa og olíufyrirtækjanna. Verkföllin muni hafa mikil áhrif á eldsneytisflutninga til dæmis en sett verði á laggirnar undanþágunefnd vegna almannaöryggis. Þessar aðgerðir væru enn eitt skrefið en samninganefndin hafi áætlanir um fleiri aðgerðir, jafnvel allsherjarverkfall.

„Við skulum vona að Samtök atvinnulífsins komi núna loksins niður á jörðina og skilji það sem ég hef sagt aftur og aftur, ásamt félögum mínum í samninganefndinni. Að eflingarfólk er tilbúið til að berjast fyrir því að við það séu gerðir góðir og sanngjarnir kjarasamningar,” segir Sólveig Anna.

Eflingarfólki verði ekki gert að taka við mylsnu annarra.

„Um leið og menn átta sig á þessu, samþykkja þennan raunverueika, þá auðvitað lýkur þessum aðgerðum hjá okkur. Þannig að það má sannarlega segja að ábyrgðin sé öll þeirra meginn og það er auðvitað löngu tímabært að þeir axli hana,” segir formaður Eflingar.

SA telur verkfallsboðun ólöglega

Samtök atvinnulífsins hafa hins vegar ákveðið að vísa þegar boðuðu verkfalli á sjö hótelum til Félagsdóms. Halldór Benjamín Þorbergsson framkvæmdastjóri Samtakanna segir samtökin telja verkfallsboðunina ólöglega.

„Þetta snýst fyrst og fremst um að verið sé að boða verkfall á meðan miðlunartillga frá Ríkissáttasemjara hefur komið fram. Þau eru í raun og veru að koma í veg fyrir að greidd verði atkvæði um þá miðlunartillögu. Það er kjarni málsins."

Væntið þið þess að Félagsdómur komist fljótt að niðurstöðu?

„Félagsdómur hefur sýnt það og sannað í gegnum tíðina að hann bregst hratt og örugglega við. Og við gerum ráð fyrir að svo verði í þessu tilviki einnig,“ segir framkvæmdastjóri SA.

Þá hafi aðeins 43 prósent þeirra sem voru á kjörskrá greitt atkvæði með verkfallinu.

„Ég hef sagt að það hljóti að vera reiðarslag fyrir forystu Eflingar að aðeins 124 félagsmenn af 284 hafi samþykkt verkfall. Það finnst mér vera afskaplega veik niðurstaða og hlýtur að vera umhugsunarefni fyrir forystu Eflingar,“ segir Halldór Benjamín.

Sólveig Anna segir niðurstöðu atkvæðagreiðslunnar hins vegar mikinn sigur í þeim sjúku kringumstæðum sem atkvæðagreiðslan fór fram í. Með ólöglegum áróðri Samtaka atvinnulífsins, ofríki og hótunum inni á vinnustöðunum, stuðningi valdastéttarinnar og með fordæmalausu útspili ríkissáttasemjara.

„Þá er augljóst að þarna vann Efling mikinn sigur. Það gerðist sem við vissum að myndi gerast. Að það fólk sem fékk þarna tækifæri til að ganga til atkvæða um hvort þau vildu leggja niður störf, tók þá ákvörðun. Alveg eins og við vorum búin að spá fyrir um,“ segir Sólveig Anna Jónsdóttir.