Þrjár stórar sýningar á einni viku
Það er nóg um að vera í lífi Ólafs Kjartans sem var að klára þrjár stórar sýningar á viku og er nú staddur í Köln fyrir næstu sýningu. Þar síðustu helgi var hann í Bergen, Noregi að sýna Parsifal eftir Wagner og stökk svo inn sem Hollendingurinn fljúgandi í Þýskalandi. Á miðvikudaginn í síðustu viku fékk hann svo símtal þar sem hann var beðinn að hlaupa í skarðið í Royal Opera House.
„Eins og oft gerist í bransanum verða forföll. Kollegi sem átti að syngja þetta hlutverk í Tannhäuser veiktist, þeir höfðu samband á miðvikudaginn, ég flaug út á fimmtudaginn, söng lokaæfingu á fimmtudagskvöld og á frumsýningunni í fyrradag.“
Gríðarleg tækifæri
Hann segir óljóst hvort hann verði meira í Tannhäuser en það er mikilvægt að halda sér á tánum í bransanum, þar sem allt getur gerst.
„Þetta gerist mjög oft og má segja að sé leiðinda aukaverkun af Covid, þá voru náttúrulega margir kollegar sem veiktust. Það er kannski ekki viðeigandi að segja þetta í þessu samhengi en eins dauði getur verið annars brauð. Ég sjálfur veiktist í byrjun janúar og þurfti að forfallast á Rigoletto sýningu í Prag.“
Hann segist þó vera einn af þeim heppnu þar sem hann verður mjög sjaldan veikur og hefur sjaldan þurft að aflýsa.
„En einhvern tíma segir skrokkurinn stopp og þá getur verið ansi dýrmætt að vera tilbúinn með eitthvað magn af hlutverkum sem maður kann. Þá getur maður stokkið inn og í þessu geta leynst gríðarleg tækifæri, eins og hjá mér í fyrradag.“
Draumur allra söngvara
Þetta var frumraun Ólafs Kjartans á sviðinu í Royal Opera House.
„Það gekk glimrandi vel og var alveg óskaplega gaman. Kompaníið og kollegar tóku mér opnum örmum og þetta er gríðarlega spennandi vinnustaður að koma inn á.
Það er draumur allra söngvara að syngja í þessum helstu húsum í heimi og þetta er eitt af aðalsviðunum. Þetta var stór stund fyrir mig og heimsklassa kollegar til hægri og vinstri.
Í tveimur aðal kvenhlutverkunum voru tvær súperstjörnur sem ég hef verið með á Bayreuth hátíðinni í Þýskalandi þannig að við þekkjumst vel. Svo þarna voru margir kunningjar og vinir og þrátt fyrir að þetta væri frumraun hjá mér var þetta pínu eins og að koma heim. Mér leið afskaplega vel á þessu sviði og stefni á að þetta hafi ekki verið í síðasta skipti sem ég kem þar fram.“
Margt á döfinni
Það er nóg fyrir stafni hjá Ólafi Kjartani sem segir dagbókina blessunarlega vera mjög þétta hjá sér til ársins 2025. Hann segir mikið lán að vera sjálfstætt starfandi og geta tekið að sér alls kyns verkefni.
„Það sem tekur nú við er verkefni við Óperuna í Köln sem er Luisa Miller eftir Verdi. Svo eru sýningar í Prag og Wagnerhátíðin í Bayreuth en það lítur allt út fyrir að ég verði þar til ársins 2026. Svo liggur leiðin til Mílan í haust að sýna La Scala óperuna,“ segir Ólafur Kjartan að lokum.
