Starfsfólk hafi verið illa upplýst og það valið af Eflingu

Atkvæðagreiðsla meðal tæplega 300 félagsmanna Eflingar sem starfa á sjö hótelum Íslandshótela og Fosshótel hófst á hádegi en ótímabundið verkfall hefst á hádegi sjöunda febrúar, eftir tvær vikur, verði það samþykkt. Atkvæðagreiðslu lýkur í næstu viku.

Davíð Torfi Ólafsson, framkvæmdarstjóri Íslandshótela, ræddi málið í Reykjavík Síðdegis á Bylgjunni í dag en hann sagði verkfall leggjast illa í þau. „Okkur finnst þetta vera, svo ég noti nú bara íslenskuna, helvíti hart að ráðast á eitt fyrirtæki,“ sagði Ólafur og benti á að Íslandshótel og Fosshótel séu undir sama hatti.

„Það er verið að setja okkar fólk í þessa stöðu að þurfa að greiða atkvæði um verkfall frekar en, sem réttast hefði verið í stöðunni, að láta Eflingarfólk allt kjósa um samninginn sem er á borðinu,“ sagði hann enn fremur.

Að hans sögn er um þriðjungur starfsmanna þeirra í Eflingu, flestir á höfuðborgarsvæðinu. Það þurfi að koma í ljós hvort að loka þurfi hótelum verði verkfallið að veruleika en Davíð sagði þau hafa ákveðna reynslu frá verkföllunum 2019, sem var í raun víðtækara, en þá tókst þeim að halda hótelunum opnum. Það flæki málin núna að verkfallið sem boðað hefur verið sé ótímabundið.

„Það er auðvitað þannig að ég get ekkert haldið öllum hótelunum opnum í marga daga og við eigendur og stjórn og framkvæmdastjórar og svoleiðis að sjá um þrifin á öllum þessum hótelunum, það sér það hver að það mun ekki ganga til lengdar,“ sagði Davíð.

Starfsfólk hafi talið að fleiri fyrirtæki yrðu með

Hann gagnrýnir þá harðlega framgöngu Eflingar í málinu og vísar til ummæla Halldórs Benjamíns Þorbergssonar, framkvæmdastjóra Samtaka atvinnulífsins, sem sagði í dag að Efling hafi farið á nokkra vinnustaði en ekki fengið þau viðbrögð sem þau vildu.

„Þau enda hér hjá okkur, þar sem auðvitað uppistaðan af fólki sem er í Eflingu er erlent fólk, og einhverra hluta vegna telja þau sig mögulega hafa fundið þarna hóp sem að muni ná fram þeirri niðurstöðu sem þau óska,“ sagði Davíð.

Þá bætir hann við að starfsfólk hafi mætt á fund Eflingar á sunnudag og talið að fleiri fyrirtæki væru að taka þátt. Svo reyndist ekki raunin. Efling hafi þá dregið upp mjög einsleita mynd af stöðunni, ekki kafað dýpra ofan í þann samning sem er á borðinu og hvaða afleiðingar verkfall myndi hafa.

„Því miður þá var þetta bara þannig að þetta var svona einhliða flutningur og okkar fólk var bara valið vegna þess að þau telja sig ná fram þessari bestu niðurstöðu. Þetta er á góðri íslensku svolítið ljótt,“ sagði Davíð.

Starfsfólk hafi því miður verið illa upplýst en stjórnendur reynt að bæta úr því í vikunni.

„Við erum búin að funda með öllu okkar fólki bæði í gær og í morgun og allt okkar fólk er orðið upplýst um stöðuna í dag. Það er upplýst um þennan samning sem að er á borðinu, um afturvirknina og allt þetta. Þannig að það er væntanlega að fara að taka upplýsta ákvörðun, okkar fólk,“ sagði Davíð.

Finnst þér líklegt að þau samþykki verkfall?

„Nei mér finnst það ekki líklegt.“