Pokalaus: Með ost í frakkavasanum og skinkupakka í tölvutöskunni

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Ég vakna flesta morgna mjög snemma, á bilinu hálf sjö til hálf átta. Það finnst mér merkilegt því með hækkandi aldri hef ég breyst frá því að vera B maður í algeran A mann. Ég vakna iðulega áður en vekjaraklukkann hringir. Því fyrr sem ég fer á fætur því betri verður dagurinn þar sem besti tími dagsins eru morgnar í ró og næði. Það þarf ekki að taka það fram að svona morgnar krefjast í það minnsta þriggja kaffibolla.“

Hvað er það fyrsta sem þú gerir á morgnana?

„Ég læðist fram tíni til föt, gleraugu og síma inn í eldhús, þar sem ég kveiki á kaffivélinni. Það passar að þegar hún hefur malað baunir og pressað þær í bolla þá heyri ég gelt frá nývaknaðri tíkinni okkar Mayu sem er ungversk Vizsla á unglingsaldri. Að vakna með hundi sem er að springa yfir gleði yfir deginum er besta leið til algerar núvitundar.

Eftir að hafa farið út í göngutúr með tíkina og leyft henni að gera þarfir sínar setjumst við saman niður. Ég byrja alla morgna á að skoða dagbókina í símanum til að fá yfirsýn yfir verkefni dagsins. Að því loknu renni ég yfir fréttir dagsins hér heima og svo erlenda miðla. Þegar klukkan nálgast hálf átta fer ég í að græja morgunmat handa syni mínum. Ég borða ekki morgunmat heldur fasta til hádegis. Áður en ég fer til vinnu bý ég svo um rúmið eftir að hafa burstað tennur.“

Var einhver karakter í áramótaskaupinu 2022 sem þú telur þig geta samsvarað þér við?

„Fyrir það fyrsta mikið svakalega var þetta gott skaup. Við vorum með stórt áramótaboð og allir hlógu frá upphafi til enda.

En konan sem gleymdi poka er eitthvað sem ég tengdi sterkt við. Ég kem reglulega við í búðinni á leið heim úr vinnu. Þar sem ég man aldrei eftir poka þá fer ég í það að reyna, til koma í veg fyrir sóun, að raða vörunum upp þannig að ég geti borið þær í einni ferð. 

Stundum krefst það þess að ég setji ost í vasann á frakkanum og ég hef farið í vinnuna með skinkupakka í tölvutöskunni. 

Oftar en ekki missi ég eitthvað á gólfið sem ég get ekki tekið upp nema hætta á að missa enn fleiri hluti. 

Eins var það karlinn sem furðaði sig á fréttamati fjölmiðla. Ég fussa stundum og sveia yfir fréttamati en það gera allir karlar sem eru að nálgast miðjan aldur.“

Í hvaða verkefni ertu að vinna helst í þessa dagana?

„Ég er svo lánsamur að vera vinnandi í mörgum og fjölbreyttum verkefnum með mismunandi fyrirtækjum, stofnunum og félagasamtökum. Fyrir vikið eru áskoranir dagsins og verkefni þeim tengdum nánast aldrei eins. Mestu máli skiptir þó að vera í kringum fólk sem er lífsglatt og skemmtilegt. Vinnufélagar mínir og viðskiptavinir eru það upp til hópa.

Við hjónin tókum svo að okkur risastórt verkefni, en við keyptum 50 ára gamalt hús í haust sem þarfnast ástar og umhyggju. Þar eru endalaus verkefni miskrefjandi sem ég reyni að sinna eitthvað á hverjum degi.“

Hvernig skipuleggur þú þig í vinnu?

„Með Outlook póstforritinu í símanum mínum. Ég fer yfir dagbók mína kvölds og morgna. Ég set allt þar inn og á það líka við leikhúsferðir og matarboð samhliða fundum og öðru vinnutengdu. 

Síðan hef ég lært að ég vinn langbest á morgnana. Afleiðing þess er að ég reyni að sinna mest krefjandi verkefnum fyrri part dagsins. 

Einnig hef ég lokað fyrir allar tilkynningar í síma nema sms og hringingar en það er stórkostleg áras á einbeitingu fólks að vera með þessi tæki í sí og æ láta mann vita að einhverju sem engu máli skiptir. 

Síðan tek ég reglulega stutta og rösklega göngutúra til að brjóta upp daginn.“

Hvenær ferðu að sofa á kvöldin?

„Til að morgnarnir geti orðið góðir þarf ég að fara snemma í háttinn. Oftast fer ég í rúmið klukkan ellefu, en stundum jafnvel enn fyrr. 

Ég les í stutta stund í rúminu áður en ég fer sofa. Síðan gerist það iðulega að ég fyllist tilhlökkunar þegar ég loka augunum yfir kaffinu sem ég mun fá mér næsta morgun.“