Vill hafa Reykja­víkur­flug­völl til taks fyrir milli­landa­flug

Fjallað var um málið í fréttum Stöðvar 2. Þær aðstæður sem verið hafa í samgöngumálum landsins frá því aðfaranótt laugardags eru einstakar að því leyti að allt millilandaflug fór úr skorðum, en þó hvorki vegna ófærðar í háloftunum né á flugbrautum, heldur vegna þess að ekki tókst að halda meginakveginum að Keflavíkurflugvelli opnum.

Reykjanesbrautin var meira og minna lokuð í fjóra sólarhringa en hefur núna verið greiðfær frá því klukkan þrjú síðastliðna nótt. Þúsundir flugfarþega urðu strandaglópar. Forstjóri Icelandair sagði þetta hafa valdið gríðarlegu tjóni fyrir félagið en einnig fyrir orðspor Íslands.

Svo alvarlegt þykir málið að umhverfis- og samgöngunefnd Alþingis hefur verið boðuð til sérstaks aukafundar klukkan tíu í fyrramálið, að ósk Njáls Trausta Friðbertssonar, þingmanns Sjálfstæðisflokksins , og segir nefndarformaðurinn Vilhjálmur Árnason að Sigurður Ingi Jóhannsson innviðaráðherra muni koma fyrir nefndina.

„Auðvitað geta komið veður sem við ráðum ekki við tímabundið. En í svona langan tíma, á meðan flugvöllurinn er opinn, það getum við ekki sætt okkur við. Og eigum að finna leiðir til að tryggja að það gerist ekki. Það hyggst ég gera með því að tala við alla viðeigandi aðila, hluteigandi sem að málinu koma, og finna leiðir til að tryggja það,“ sagði Sigurður Ingi eftir ríkisstjórnarfund í morgun.

Athygli vakti að Icelandair fór í það að selflytja farþega og áhafnir á þotum frá Keflavík til Reykjavíkur. Njáll Trausti, sem sjálfur kemur úr fluggeiranum, greip boltann á lofti á facebook, skoða ætti við svona aðstæður að flytja millilandaflug tímabundið til Reykjavíkur.

Í samtali við fréttastofu sagðist hann vera með það í huga að tryggja lágmarkssamgöngur Íslands við umheiminn og fljúga þá til borga eins og London og Kaupmannahafnar, en viðurkenndi að flugafgreiðslan í Reykjavík væri bágborin fyrir slíkt. Þar þyrfti að byggja nýja 1.500 til 2.000 fermetra flugstöð og kveðst hann raunar gjarnan vilja sjá meira reglubundið millilandaflug frá Reykjavík.

Njáll Trausti bendir á að kostir flugvallarins í Reykjavík hafi sýnt sig vel síðustu daga. Meðan 40 til 55 hnúta vindhraði hafi verið á Keflavíkurflugvelli hafi hann á sama tíma verið 30 til 40 hnútar á Reykjavíkurflugvelli. Algengt sé að í Reykjavík sé vindhraði í kringum 15 hnútum minni heldur en á Miðnesheiði.

En hvaða aðgerðir sér innviðaráðherrann til úrbóta?

„Það þarf að skoða ýmislegt. Heimild Vegagerðarinnar til að færa bíla, draga þá burt, og svo framvegis. Hvort við getum stýrt lokunum öðruvísi og fleiri spurningar sem á eftir að spyrja þegar við fáum sérfræðingana að borðinu. Það er það sem ég hyggst gera,“ sagði Sigurður Ingi.

Hér má sjá frétt Stöðvar 2: