Matargerð og myndlist í eina sæng

Sýningin afhjúpar áhrif tímans og fjallar um umbreytingu efna og ferðalag þess frá Vesturlandi til Austfjarða. Sýningarstjóri er Jóhanna Rakel.

Áhrifaríkt ferðalag

Árið 2020 héldu Antonía og Íris María sína fyrstu sýningu saman sem bar heitið Augnablikin. Þráinn Freyr kom á sýninguna og bað stelpurnar að gera verk fyrir veitingastaðinn sinn.

„​​Hugmyndin að þessari sýningu kviknaði þegar við spurðum Þráin Frey um uppruna ÓX. Hugur hans fór beint vestur á Snæfellsnes þar sem ættaróðalið hans er. Hann talaði svo fallega um heimabæinn sinn og eldhúsið sem hann flutti yfir á ÓX. Þá vissum við að það stemmdi í ferðalag til að nálgast kjarna sýningarinnar,“ segja Antonía og Íris María.

Þær fóru því á Snæfellsnes og enduðu síðan á Austfjörðum. Jarðefnin sem þær notast við voru fengin á Búðum sem eru heimaslóðir Þráins Freys. 

Ferðalagið veitti þeim mikinn innblástur en myndlistin er sköpuð með jarðefnunum og sumac kryddi á heimabæ Antoníu á Berunesi.

Matur sem listform

Antonía og Íris María segjast án efa upplifa mat sem ákveðna list .

„Matur og listform eru svipuð í okkar augum. Þetta er ákveðin samsetning efna sem fara í gegnum ferli og ákveðnar aðstæður sem hafa áhrif á útkomuna. 

Matargerð inniheldur spennandi efnablöndur, litapalletur, áferð og margt fleira. Sama má segja um myndlist.

Litapallettan sem við sóttum á Búðum má líkja við matinn á Sumac sem var skemmtileg tilviljun sem uppgötvaðist í ferlinu. Við teljum myndlistina geta bætt við upplifun gesta Sumac og ÓX, þar sem myndirnar endurspegla kjarnann.“

Umbreyting og ferðalag efna

Drög að sýningunni hófust í Covid faraldrinum og þær upplifðu mikla ferðaþrá þegar allir héldu sig heima. Því var mikið ævintýri að undirbúa sýninguna.

„Hugmyndarvinnan hefur tekið langan tíma, sem og undirbúningur. Við höfum talað um að við séum með Leiðarvísi augnablika til að sýna ferðalag efna og umbreytingu þess. Við sækjum jarðefni fyrir vestan og sköpum með þeim fyrir austan.“

Verkin eru ljósmyndir af ferli málverks á álplötu þar sem listakonurnar grípa augnablikin með ljósmyndun af ferlinu. 

„Með sýningunni eru efnin sem við höfum sótt í forgrunni en við höfum sjálf öll farið gegnum ýmsar breytingar í lífinu síðan 2020. Hugmyndarvinnan um útfærslu sýningarinnar hefur verið í kollinum okkar í yfir tvö ár og við höfum breyst með sýningunni. 

Við erum ekki frávik frá áhrifum tímans, við þroskumst og eldumst og nú erum við tilbúnar að leiða aðra í ferðalag í gegnum Sumac,“

segja Antonía og Íris María að lokum. 

Opnunin stendur frá klukkan 15:30 til 17:30 í dag. Nánari upplýsingar má finna hér.