Guðlaugur Þór tekur slaginn við Bjarna

Guðlaugur Þór tilkynnti ákvörðun sína í ræðu í Valhöll rétt í þessu. Í ræðu sinni lagði Guðlaugur áherslu á það að án sinna stuðningsmanna væri hann ekki neitt og að án fólksins í flokknum væri Sjálfstæðisflokkurinn ekki neitt.

Guðlaugur þór hóf ræðu sína á því að segja að enginn stjórnmálamaður ætti betri vini og stuðningsmenn en hann. Þá sagði hann fólkið í salnum vita hvernig staðan í Sjálfstæðisflokknum væri. Flokkurinn væri lengi búinn að vera að vinna varnarsigra og nú þyrfti að snúa vörn í sókn.

„Þegar maður fræ bréf frá Valhöll sem segir: „Þetta er allt í lagi, við erum ennþá stærsti flokkurinn.“ þá brá mér,“ sagði Guðlaugur Þór.

„Sjálfstæðisflokkurinn á ekki að vera stærsti flokkurinn. Hann á alltaf að vera langstærsti flokkurinn.“

Ræðuna og viðtal við Guðlaug Þór má sjá í spilaranum hér að neðan:

Þá gaf Guðlaugur lítið fyrir fullyrðingar Bjarna um að ríkisstjórn Íslands myndi slitna ef hann missti formannsstólinn. „Það er Sjálfstæðisflokkurinn sem er í ríkisstjórn, síðast þegar ég vissi,“ sagði Guðlaugur.

Þeir Guðlaugur Þór og Bjarni leiða hvor sína fylkingu innan Sjálfstæðisflokksins. Bjarni gaf það út fyrr í dag að hann hans tími í stjórnmálum verði liðinn undir lok lúti hann í lægra haldi fyrir Guðlaugi Þór á Landsfundi.

Eftir ræðuna sagði Guðlaugur í viðtali við fréttastofu að þetta yrði ekki í fyrsta né síðasta sinn sem Sjálfstæðismenn kysu formann. Þetta væri eðlilegt ferli innan flokksins.

Guðlaugur sagði einnig að langt væri síðan svo margir hefðu komið saman í Valhöll.

„Þetta fólk er hingað komið til að fagna þessari ákvörðun minni. Ég veit ekki hvenær það voru svo margir í valhöll síðast en það er langt síðan.“

Landsfundur Sjálfstæðisflokksins er haldinn að jafnaði annað hvert ár en hefur ekki verið haldinn síðan árið 2018 vegna heimsfaraldurs. Fyrst átti hann að fara fram dagana 13.-15. nóvember árið 2020 en einungis 200 manns máttu koma saman þá vegna fjöldatakmarkana.

Þá var aftur reynt að halda landsfund í ágúst árið 2021 en þá var veiran aftur komin á fulla ferð og því ekki unnt að halda fund.

Bjarni var kjörinn formaður Sjálfstæðisflokksins árið 2009. Hann tók þá við formannskeflinu af Geir H. Haarde. Geir tók við af Davíð Oddsyni árið 2005. Bjarni lagði þá Kristján Þór Júlíusson á landsfundi.

Tvö hafa gert tilraun til þess að fella Bjarna,  annars vegar Pétur Blöndal heitinn árið 2010 og hins vegar Hanna Birna Kristjánsdóttir árið 2011. Bjarni fór með sigur af hólmi gegn þeim báðum. Árið 2009 hlaut hann 62 prósent atkvæða gegn Pétri og aðeins 55 prósent atkvæða gegn Hönnu Birnu. Athygli vakti á landsfundi árið 2013 þegar Hanna Birna hlaut tæplega nítján prósent atkvæða þrátt fyrir að hafa ekki gefið kost á sér í embætti formanns.

Á síðast landsfundi árið 2018 var Bjarni einn í framboði og var kjörinn af yfirgnæfandi meirihluta landsfundarmanna eða 96 prósent.