Janus fór á kostum í naumum sigri gegn meisturunum

Kolstad og Elverum áttust við fyrir framan troðfulla Trondheim Spektrum höll í dag þar sem yfir níu þúsund manns mættu til að sjá þessi tvö bestu lið landsins eigast við.

Nokkuð jafnræði var með liðunum í upphafi leiks, en gestirnir í Elverum náðu þó yfirhöndinni um miðjan fyrri hálfleikinn og náðu mest fjögurra marka forskoti fyrir hlé. Það voru þó heimamenn í Kolstad sem skoruðu seinasta mark hálfleiksins og staðan var því 10-13, Elverum í vil, þegar gengið var til búningsherbergja.

Gestirnir höfðu áfram yfirhöndina framan af í síðari hálfleik og leiddu með tveimur mörkum þegar um tíu mínútur voru til leiksloka. Heimamenn skoruðu þó næstu tvö mörk leiksins og staðan var því jöfn þegar um átta mínútur voru eftir.

Gestirnir leiddu svo með einu marki, 23-24, þegar um þrjár mínútur voru eftir, en þá skoraði Janus tvö mörk í röð og kom Kolstad yfir í fyrsta skipti síðan í stöðunni 6-5. Gestirnir í Elverum fengu tækifæri til að jafna leikinn þegar örfáar sekúndur voru til leiksloka, en Sigvaldi Guðjónsson var réttur maður á réttum stað í vörninni og stal boltanum og heimamenn tryggðu sér tveggja marka sigur um leið og lokaflautið gall, lokatölur 26-24.

Janus Daði var markahæsti maður Kolstad með sjö mörk í kvöld, en Sigvaldi skoraði eitt mark fyrir liðið. Orri Freyr Þorkelsson komst ekki á blað fyrir Elverum.

Kolstad trónir enn á toppi deildarinnar með fullt hús stiga eftir sex umferðir, en Elverum situr í fjórða sæti með sex stig.