Stendur tæpt að stjórnar­kjör geti farið fram í dag

Upplausn varð á þingi ASÍ í gær þegar Ragnar Þór Ingólfsson, formaður VR, Sólveig Anna Jónsdóttir, formaður Eflingar, og Vilhjálmur Birgisson, formaður Starfsgreinasambandsins hættu við framboð til miðstjórnar ASÍ og gengu út af þinginu. 

Ragnar Þór hafði gefið kost á sér til forseta ASÍ, Sólveig Anna til annars varaforseta og Vilhjálmur til þriðja varaforseta. Þau sögðu í yfirlýsingum í gær að ósmekkleg orðræða og árásir á þau hafi orðið til þess að þau hafi ekki viljað halda framboðum sínum til streitu. 

Vilhjálmur sagði í Reykjavík síðdegis á Bylgjunni í gær að þau Sólveig og Ragnar, auk fulltrúa félaga þeirra muni ekki taka þátt í störfum þingsins í dag. Gangi það eftir mun litlu muna að ekki nægilega margir mæti til að hægt verði að halda kosningu í miðstjórn. 

Vilhjálmur lýsti yfir efasemdum um að þingið geti klárast. 

„Það eru örfáir þingfulltrúar eftir. 40 til 45 prósent eftir. Ég veit ekki hvernig þau ætla að klára þingið.“

Stjórnarkjör gæti frestast í dag

Starfandi forseti segir mikla óvissu ríkja í dag.

„Framhaldið er háð þeirri óvissu hver mætingin verður á þingið. Við eigum eftir að sjá hvernig það verður. Maður gerir ráð fyrir að allt gangi upp en það er samt ákveðin óvissa í því,“ segir Kristján Þórður Snæbjarnarson, starfandi forseti ASÍ, í samtali við fréttastofu. Kristján hefur gefið kost á sér aftur sem fyrsti varaforseti Alþýðusambandsins. 

Talið verði inn á þingið til að tryggja að nógu margir séu mættir. Þingið þurfi áður en til stjórnarkjörs kemur að klára þau mál sem voru á dagskrá í gær.

„Það var mælendaskrá þegar við frestuðum þinginu og það mun koma í ljós þegar við byrjum  hvernig málin munu vinnast áfram. Dagskráin er þannig að kosningar ættu að hefjast klukkan eitt. Maður verður að ganga út frá því að það standist en það er allt farið að riðlast samt sem áður.“

Mæti ekki nógu margir fulltrúar á fundinn í dag svo stjórnarkjör geti farið fram segir Kristján að fresta þurfi fundi og boða til nýs. 

„Þá þarf að gefa færi á að manna fundinn og svo getur þing haldið áfram í kjölfarið,“ segir Kristján. 

Mikið áfall fyrir ASÍ

Það sé mikið áfall fyrir ASÍ að þessi stóru félög hafi gengið út af þinginu í gær og ætli jafnvel að segja sig frá sambandinu alfarið. 

„Að sjálfsögðu er það mikið áfall að þetta farið með þessum hætti. Maður hefði viljað ná að klára þingið og efla forystuna til muna en það er augljóst að þetta er mikið áfall,“ segir Kristján. 

Verið sé að ræða við allan innan sambandsins til þess að reyna að láta hlutina ganga. Aðildarfélögin þurfi að ná saman og sambandið að styrkjast. 

„Þetta er staða sem þarf að vinna úr og við erum að reyna það.“

Í haust ganga aðildarfélög ASÍ til kjaraviðræðna við ríkið og þó samningsskylda sé hjá hverju og einu félagi hefur ASÍ farið fyrir viðræðum fyrir hönd sinna aðildarfélaga í gegn um tíðina. Ólgan innan ASÍ hefur vakið upp áhyggjur um kjaraviðræðurnar. 

„Þetta auðvitað setur okkur í erfiðari stöðu. Við hefðum viljað ná að þétta raðirnar gagnvart stjórnvöldum og vinna að þeim málum sem þar eru. Það voru mikil sóknarfæri í því. Við munum þurfa að vinna úr þessari stöðu í kjölfar þingsins og búa til þá pressu sem þörf er á.“

Fréttin var uppfærð klukkan 9:20.