Bein útsending: Kvöldfréttir Stöðvar 2

Við heyrum einnig í viðskiptavinum stórmarkaða um þá ákvörðun Krónunnar að frysta verð á tilteknum vörum - og berum gagnrýni á ákvörðunina undir framkvæmdastjórann í beinni útsendingu. 

Eftirspurn eftir frjósemismeðferðum hefur aukist töluvert síðustu ár eða frá því kórónuveirufaraldurinn hófst. Biðin eftir því að komast að hefur verið allt að hálft ár þegar hún hefur verið hvað lengst. Þá hefur konum fjölgað sem vilja frysta egg.

Þá tökum við stöðuna á stríðinu í Úkraínu en kjarnorkuverið í Zaporizhzhia var í dag aftengt frá úkraínska rafveitukerfinu - í fyrsta sinn frá opnun þess. Áhyggjur af kjarnorkuslysi stigmagnast. Vladímír Pútín Rússlandsforseti boðar gríðarlega innspýtingu inn í rússneska herinn á næstu mánuðum. 

Og loks ætlar Elísabet Inga fréttamaður okkar að skella sér í hundahlaup úti á Seltjarnarnesi í beinni útsendingu. Hundrað hundaeigendur hafa skráð sig til leiks. Þetta og fleira í kvöldfréttum Stöðvar 2 klukkan 18:30.