Dacia Duster á toppnum annan mánuðinn í röð

Kristinn Ásgeir Gylfason skrifar 1. ágúst 2022 07:01

Dacia Duster hefur reynst vel við íslenskar aðstæður.

Flestar nýskráningar í júlí voru skráningar bíla af Toyota tegund með 296 bíla og Kia var í öðru sæti með 239. Dacia var í þriðja með 234 bíla nýskráða. Vinsælasta nýskráða undirtegundin í júlí var Dacia Duster, annan mánuðinn í röð, með 226 bíla nýskráða. Upplýsingar um nýskráningar eru fengnar af vef Samgöngustofu.

Næst vinsælasta undirtegundin í júlí var Suzuki Vitara með 90 bíla nýskráða og í þriðja sæti var Land Cruiser með 82 bíla nýskráða.

Nýskráningar í júlí eftir framleiðendum.

Heildarnýskráningar í júlí voru 2693 eintök það er sambærilegt nýskráningum í júní, sem voru 2746. Júlímánuður í fyrra var einnig afar samværilegur með 2816 nýskráningar, eða 123 fleiri en í ár.

Orkugjafar

Allir Duster-arnir sem voru nýskráðir í júlí eru díselbílar, sem gerir talsvert til að gera dísel vinsælasta orkugjafann í júlí með 579 díselbíla nýskráða í júlí. Annað sætið hreppa hreinir bensínbílar.

Þessi þróun er afar áhugaverð í ljósi þróunar verðs á bensíni og dísel. Sem hefur hækkað mikið undanfarið. Auk þess eru biðlistar eftir rafbílum ansi langir hjá flestum umboðum. Það er því ekki nema von að nýskráningar hreinna rafbíla eru að dragast saman hlutfallslega miðað við það besta sem sést hefur. Nýskráningar hreinna rafbíla voru 424 í júlí.