„Viljum fá fólk til að koma auga á það sem hér leynist“

„Við setjum upp sumarsýningu hverju sinni og erum að gera það núna fimmta sumarið í röð. Fyrst vorum við á bænum Kleifum sem er rétt fyrir utan Blönduós og í fyrra settum við upp sýningu í Hrútey með Shoplifter,“ segir Finnur.

Að þessu sinni fer sýningin fram í húsi í gamla bænum á Blönduósi og tekur umhverfið virkan þátt í listrænni heild sýningarinnar.

„Þetta er gamalt hús frá þar síðustu öld sem heitir Hillebrandtshúsið og er í eigu bæjarins,“ segir Finnur og bætir við að sýningargestir fari í ævintýraferð um húsið, í gegnum kjallarann og inn í gegnum gólfið.

Bylgjur, tækni og sjónræn upplifun

Áslaug er sýningarstjóri FLÓA og í texta sýningarinnar segir hún: 

„Verkið Flói á sér fyrirrennara í mörgum, ef ekki hreinlega öllum fyrri verkum Finnboga en bylgjur af ýmsum gerðum og stærðum eru eitt af hans aðal viðfangsefnum, s.s. ljós, hljóð, rafbylgjur, útvarpsbylgjur, skjálftabylgjur eða bylgjur í vatni. Hér fáum við að upplifa á eigin skinni sjávarföllin þar sem Húnaflóinn og Blanda mætast og það vita allir sem til þekkja að þar eru engir smákraftar á ferð. Tæknin er til staðar, stríðin og viðkvæm. Stór hluti búnaðarins er um borð í fleka, ofurseldur valdi úthafsöldunnar sem rís og hnígur hér utan við ósinn. Upplifunin inni í sjálfri innsetningunni er fyrst og fremst sjónræn en hún kallar fram sterka líkamlega tilfinningu fyrir jafnvægisleysi, mögulega flökurleika. 

Flekinn sjálfur hefur sem tákn margvíslega merkingu. Ekki síst hefur hann sterkar skírskotanir í samtímanum þegar daglega berast fréttir af fólki sem leggur líf og limi í hættu við að fleyta sér milli heimsálfa í einföldum bátkænum með þá von í brjósti að öðlast hamingju og betra líf.“

Upplifunarverk

Finnur segir þetta vera svokallað upplifunarverk.

„Í rýminu upplifir maður verkið sem er endurvarp frá fleka sem við erum að vinna í að setja út á Húnaflóa og þú upplifir hreyfingu flekans. Síðan gengurðu út úr húsinu og horfir á flekann sem að flýtur út á flóa.“

Menningarverðmæti

„Það eru rosa margir vita ekki að hér sé gamall bær, margir sem spída í gegn og stoppa bara á bensínstöðinni,“ segir Finnur og bætir við: 

„Við viljum beina augum fólks að þessu menningarverðmæti sem bærinn er.“

Sýning Shoplifter á Hrútey í fyrrasumar vakti mikla athygli.

„Þetta er eyja í miðri Blöndu sem mjög fáir vissu af en um 6-8000 manns komu. Við erum að reyna að benda fólki á þennan byggðarkjarna sem heitir Blönduós og fá fólk til að koma auga á það sem hér leynist.“

Gróska í listum úti á landi

Finnur segir viðtökur við listasýningunum hafa verið mjög góðar.

„Þetta er auðvitað orðið að föstum punkti hjá fólki sem hefur áhuga á myndlist og er að stabílísérast á þann hátt. Áhuginn hefur einnig aukist innan bæjarins, við erum búin að vera í samstarfi við bæinn og þátttaka bæjarbúa er alltaf að verða meiri og meiri. Það kemur fólki sífellt á óvart hvað það hafa margir áhugi á myndlist.“

Hann segir jákvætt að sjá sífellda aukningu á listasýningum um allt land.

„Þetta eru ótrúlega metnaðarfullar listsýningar og það er mikil gróska úti á landi í myndlist og listum,“ segir Finnur og bætir að lokum við að allir séu velkomnir í Hillebrandtshúsið í sumar.

Listamaðurinn Finnbogi Pétursson er fæddur árið 1959. Hann nam við Myndlista- og handíðaskóla Íslands í Reykjavík og Jan van Eyck Akademie í Maastricht í Hollandi. Verk eftir hann er að finna í opinberum söfnum og einkasöfnum víða um heim. Hann hefur haldið fjölda sýninga heima og erlendis og var fulltrúi Íslands á Feneyjatvíæringnum árið 2001. Sýningin verður opin frá klukkan 13:00 - 18:00 alla daga vikunar og stendur til 14. ágúst.