Fyrsti laxinn kominn úr Stóru Laxá

Fyrstu laxarnir sáust í síðustu viku á svæði fjögur og þar af voru nokkrir rígvænir. Fyrsti laxinn er þegar kominn á land í ánni sem var að opna og það var Eva Björg Sigurðardóttir sem landaði honum en þetta var 87 sm hængur sem kom á Collie Dog. Nýtt veiðihús og breytt skipulag á veiðisvæðinu tekur við þeim veiðimönnum sem mæta í Stóru Laxá í sumar og núna eru svæði 1-2-3 veidd saman en svæði 4 er ennþá veitt sér. 

Eftir þessa breytingu væri nær að kalla svæðin sem voru í eina tíð seld í sitthvoru lagi, þó svo að svæði 1-2 hafi lengi verið seld saman, einu nafi og svæði 4 þar sem áin rennur um falleg gljúfur öðru nafni. Nýtt veiðihús hefur verið tekið í notkun á neðra svæðinu og er það sérstaklega glæsilegt og vel búið. Það verður spennandi að fylgjast með Stóru Laxá í sumar.