„Í dag erum við mjög þakklát fyrir að hafa tekið áhættuna“

Blaðamaður hafði samband við Ingu Elínu sem er í óðaönn að undirbúa sig fyrir hátíðina sem hefst á miðvikudaginn og hefur varla undan að anna eftirspurn. 

Hvernig er stemningin fyrir HönnunarMars?

Stemningin er góð og mikil eftirvænting fyrir nýju diskunum sem við erum að kynna. Mér finnst mjög gleðilegt að fólk fái að hittast aftur eftir tvö erfið Covid ár.

Hefur þú áður tekið þátt?

Já, ég hef oft tekið þátt áður, en það er sérstaklega gaman að halda sýningu í stemningunni hér á Skólavörðustígnum.

Hvernig kviknaði hugmyndin að bollunum og svo diskunum?

Hugurinn leitar að hugmyndum úr ýmsum áttum, og oft á ferðalögum mínum. Ég hannaði bollana út frá gömlum pottum sem voru notaðir hér á árum áður í Jótlandi. 

„Litlu diskarnir sem ég kynni nú á Hönnunarmars er undir áhrifum frá skýjum himinsins og jafnvel fallegum öldum hafsins.“

Hver voru fyrstu skrefin í að framkvæma þær?

Fyrstu skrefin að hönnun bollana voru að renna 20-30 mismunandi form sem ég hafði séð fyrir mér. Hönnunin hefur þó tekið ýmsum breytingum frá upphafi.

Hvernig viðbrögð hefur hönnunin verið að fá?

Hönnunin hefur fengið frábærar viðtökur og sem dæmi voru Veltibollarnir að koma aftur eftir að hafa verið uppseldir frá því í Desember. 

„Einu vandræðin okkar í galleríinu er að eiga nóg til að selja og við höfum því ekki getað aukið opnunartímann þrátt fyrir afléttingar allra takmarkana.“

Hvað hefur verið skemmtilegasta verkefnið hjá þér til þessa?

Það hefur verið mjög gefandi og skemmtilegt að móta fyrirtækið í kringum mín verk með syni mínum. Það hefur gefið mér mikinn innblástur og styrkt okkar samband.

Hvernig var að opna gallerí á þessum skrítnu tímum?

Sem betur fer ákváðum við að opna galleríið, þrátt fyrir óvissuna sem fylgdi fyrstu takmörkunum Covid faraldursins. Það var einfaldlega orðið of seint til að hætta við en við færðum markaðsetninguna mikið yfir á netið. 

„Í dag erum við mjög þakklát fyrir að hafa tekið áhættuna og þróað fyrirtækið okkar í samræmi við breytta tíma.“

Hvað er framundan?

Framundan er að koma fleiri af mínum verkum í framleiðslu svo ég geti helgað mig meira í sköpun stærri verka.