Liðsstyrkur frá Svíþjóð í Vesturbæinn

Sænski varnarmaðurinn Pontus Lindgren hefur skrifað undir tveggja ára samning við KR.

Hann er 22 ára gamall og kemur til liðsins frá IF Sylvia í heimalandi sínu en að því er fram kemur í tilkynningu KR er Sylvia venslalið sænska úrvalsdeildarliðsins Norrköping sem hefur fjölmörg tengsl við KR og fleiri íslensk lið.

Lindgren þessi æfði með KR í æfingaferð liðsins á Spáni á dögunum og er nú genginn í raðir félagsins.

KR hefur leik í Bestu deildinni á miðvikudag þegar þeir heimsækja nýliða Fram.