„Aldrei séð Davíð Arnar klikka á jafn mörgum þristum“

„Þetta var ekki auðvelt og úrslitin gefa ekki alveg rétta mynd af leiknum. Grindavík var lengi í rassgatinu á okkur en mér fannst við ná að sigla fram úr í fjórða leikhluta en seinna mátti það ekki vera,“ sagði Ragnar Örn kátur í samtali við Vísi eftir leik.

Ragnar var ánægður með sóknarleikinn í fyrri hálfleik sem skilaði 55 stigum en Grindavík var aðeins sjö stigum undir. 

„Við skoruðum 55 stig í fyrri hálfleik og mér leið eins og við hefðum átt að hafa gert 70 stig. Við fengum öll þau skot sem við vildum og hvort mér sé að dreyma eða ekki en ég hef aldrei séð Davíð Arnar klikka á svona mörgum þristum,“ sagði Ragnar og kenndi Davíð um hvers vegna forskot Þórs var ekki stærra í hálfleik.

Þór byrjaði seinni hálfleik vel og byrjuðu heimamenn á 15-3 áhlaupi sem Ragnar var afar sáttur með.

„Við vildum stoppa þá og keyra á þá í kjölfarið sem við gerðum. Við brutum þá niður með varnarleik,“ sagði Ragnar Örn Bragason að lokum.