Innlent

Hvalveiðikvótinn heimilar veiðar á 193 langreyðum

Kristján Már Unnarsson skrifar
Hvalur 9 kominn í klössun fyrir komandi vertíð í slippnum í Reykjavíkurhöfn í dag.
Hvalur 9 kominn í klössun fyrir komandi vertíð í slippnum í Reykjavíkurhöfn í dag. Egill Aðalsteinsson

Fátt virðist geta komið í veg fyrir að stórhvalaveiðar hefjist að nýju við Ísland í sumar eftir fjögurra ára hlé. Heimilt er að veiða hátt í tvöhundruð langreyðar í ár og Hvalur hf. er auk þess með fullgilt vinnsluleyfi í hvalstöðinni í Hvalfirði.

Í fréttum Stöðvar 2 voru sýndar myndir úr Slippnum í Reykjavíkurhöfn í dag. Fyrstu merki þess að verið sé að undirbúa hvalvertíð sjást venjulega þar og þau sáust á mánudag þegar Hvalur 9 var dreginn upp í klössun. Í framhaldinu er svo gert ráð fyrir að Hvalur 8 verði tekinn upp í slipp en báðir teljast hvalbátarnir öldungar, smíðaðir 1948 og 1952.

Hvalur 8 fer í slipp á eftir Hval 9.Egill Aðalsteinsson

Fjögur ár eru frá því langreyður var síðast veidd við Ísland en það var sumarið 2018. Á vertíðinni þá veiddust 146 langreyðar og unnu alls um 150 starfsmenn hjá Hval hf., bæði á bátunum tveimur og við hvalskurðinn í Hvalfirði.

Forstjóri Hvals, Kristján Loftsson, hefur núna staðfest í viðtali við Morgunblaðið að stefnt sé á hvalveiðar í sumar. Veiðikvótinn er 161 langreyður. Jafnframt er heimilt að flytja milli ára allt að tuttugu prósent af óveiddum kvóta fyrra árs. Það gerir 32 dýr til viðbótar. Þar með fer kvóti ársins upp í 193 dýr.

Samkvæmt upplýsingum frá Matvælastofnun er hvalstöðin með fullgilt starfsleyfi til vinnslu á hvalkjöti. Það er þó með þeim fyrirvara að stofnunin geri úttekt á byggingum og búnaði áður en vinnsla hefst.

Hvalveiðar hafa venjulega hafist í fyrrihluta júnímánaðar. Ef sami háttur verður hafður á í ár má búast við að búið verði að leysa landfestar hvalbátanna fyrir þjóðhátíðardag.

Hér má sjá frétt Stöðvar 2:

Hvalveiðar Hvalfjarðarsveit Sjávarútvegur

Tengdar fréttir

Hvalur fær fimm ára veiðileyfi á langreyði

Leyfið er til fimm ára. Kveðið er á um að fyrirtækinu beri að hafa frumkvæði að skila dagbókum um veiðarnar sem það vanrækti að skila á liðnu tímabili.

Hvalvertíðin blásin af, veiðileyfi kom of seint

Engar hvalveiðar verða þetta sumarið hjá Hval hf. Skýringin er sögð sú að veiðileyfi hafi komið of seint til að nægur tími gæfist til að ljúka nauðsynlegu viðhaldi á hvalbátunum.

Aðeins fjórir mótmæltu hvalveiðum

Aðeins hafa verið haldin ein mótmæli við íslenskt sendiráð í kjölfar ákvörðunar Kristjáns Þórs Júlíussonar sjávarútvegsráðherra um að leyfa áframhaldandi veiðar á langreyði og hrefnu til ársins 2023.

Segir langreyðarstofninn hafa þrefaldast frá 1987

Íslendingar halda áfram hvalveiðum og verður heimilt að veiða allt að 209 langreyðar og allt að 217 hrefnur á ári næstu fimm ár, samkvæmt ákvörðun sjávarútvegsráðherra.

Mest lesið


Fleiri fréttir

Sjá meira


×

Mest lesið