„Óraunverulegt að vera kölluð aftur og aftur upp á svið“

Tinni Sveinsson skrifar 19. mars 2022 13:01

Birgitta Haukdal og Írafár koma fram á Hlustendaverðlaununum. Vísir

Hlustendaverðlaunin 2022 verða haldin í kvöld í beinni útsendingu á Stöð 2 og á Vísi. Hljómsveitin Írafár kemur fram á hátíðinni en hún á enn metið í fjölda verðlauna frá upphafi Hlustendaverðlaunanna.

Liðin eru nær tuttugu ár síðan þetta met Írafár var sett. Birgitta Haukdal var þá valin söngkona ársins og kynþokkafyllsti popparinn, plata ársins var Allt sem ég sé, lag ársins Ég sjálf, myndband ársins Allt sem ég sé, sveitin var valin vinsælasta hljómsveitin og heimasíðan þeirra irafar.is sú besta.

Birgitta man vel eftir þessu kvöldi og segir hún það hafa verið óraunverulegt að vera kölluð aftur og aftur upp á svið að taka á móti verðlaunum.

Njóta þess að koma fram

Hún segir hljómsveitina njóta þess meira að koma fram í dag en áður. „Í dag er hvert augnablik dýrmætara en áður þegar við vorum alltaf alls staðar,“ segir Birgitta og eiga áhorfendur í kvöld því von á góðu.

Hægt er að rifja upp gömlu Hlustendaverðlaunin sem Írafár rúllaði upp í spilaranum hér fyrir neðan.

Hlustendaverðlaunin 2022 eru í beinni útsendingu og opinni dagskrá á Stöð 2 klukkan 19. Einnig verður hægt að horfa á þau hér á Vísi. Verðlaunahátíðin er haldin í Kolaportinu.

Atriðin sem koma fram í ár eru átta talsins en auk Írafárs koma fram Aron Can, Sigga Beinteins, Kælan mikla, Bríet, GDRN, Jón Jónsson og Hugo.

Eftirfarandi listamenn koma til greina til verðlaunanna. Kosning fór fram hér á Vísi fyrr á árinu og bárust alls 93 þúsund atkvæði.