Guðjón Guðmundsson hitti Brynjar Darra í gær og fékk að vita meira um af hverju hann sér hættur í handbolta aðeins 29 ára gamall.

„Það var í viðureign KA og Stjörnunnar í sextán liða úrslitum Coca Cola bikarsins þar sem KA-maðurinn Ólafur Gústafsson skaut í andlitið á Brynjari Darra. Auðvitað óviljaverk en á þeirri stundu var Brynjar alveg viss að handboltaskórnir yrðu settir upp í hillu,“ sagði Guðjón Guðmundsson.

„Ég var búinn að fá höfuðhögg ári fyrr og vissi alveg hvernig meðferðin yrði. Ég fékk svona „flashback“ og var skíthræddur um afleiðingarnar. Ég vildi því eiginlega kalla þetta gott eftir það,“ sagði Brynjar Darri Baldursson.

„Þú varst reiður,“ sagði Gaupi og undir má sjá myndir af viðbrögðum Brynjars Darra eftir að hafa fengið skotið í andlitið.

Eitthvað sem kviknaði í mér og ég sá bara rautt

„Já vægast sagt. Það var eitthvað sem kviknaði í mér og ég sá bara rautt. Við vorum fljótir að útkljá það við Óli eftir leikinn. Maður velur þetta sjálfur að standa þarna á milli stanganna en það getur haft helvíti slæmar afleiðingar. Það gerði það í þetta skiptið,“ sagði Brynjar Darri.

Brynjar Darri er líka að hugsa um sinn starfsferil sem arkitekt. „Já fyrst og fremst. Ég verð að geta teiknað, mælt og allt svona,“ sagði Brynjar en eru markverðir hræddir um að fá skot í andlitið.?

„Hræddir og ekki hræddir. Þetta er ákveðin sálræn barátta um næsta skot og svo framvegis. Kannski er það hræðsla upp að vissu marki,“ sagði Brynjar.

Menn minna að leika sér að þessu heldur en í gamla daga

„Þetta getur orðið sálfræðistríð á milli leikmanna og leikmennirnir geta verið að setja boltann nálægt hausnum. Þú ferð að beita þér öðruvísi á móti viðkomandi leikmanni. Þetta þekkist alveg en ég held að menn séu orðnir aðeins meðvitaðir um þetta núna. Menn eru minna að leika sér að þessu heldur en í gamla daga,“ sagði Brynjar.

En var Brynjar lengi að jafna sig eftir þetta skot í andlitið frá Ólafi Gústafssyni?

„Þetta var eins og síðast. Pínu jafnvægisleysi í nokkra daga og svo er það hausverkur sem fylgir þessu. Svo hægt og rólega, sem betur fer í þetta skiptið, þá er ég orðinn mjög góður,“ sagði Brynjar en tók hann ákvörðunina strax um að hætta?

Heilsan, fjölskyldan og vinnan

„Ég ætla ekki að ljúga um það. Skotið kom beint í andlitið og ég fór í grúfu á gólfið. Það fyrsta sem ég hugsaði var að þetta væri komið gott,“ sagði Brynjar. „Þá eru menn fyrst og fremst að hugsa um heilsuna sína,“ skaut Gaupi inn í.

„Já heilsuna, fjölskylduna og vinnuna. Þú vilt geta sinnt öllu öðru hundrað prósent. Það er bara þannig,“ sagði Brynjar.

„Nú er svolítið liðið síðan að þetta gerðist. Þér hefur ekki langað inn á völlinn aftur,“ spurði Gaupi.

Fór á fund

„Jú jú. Maður getur aldrei slitið sig almennilega frá þessu. Ég fór á fund með Einari og Patta og við ræddum þetta aðeins. Það var niðurstaðan að ef allt fer til fjandast hjá markvörðunum þá get ég svo sem hoppað inn í þetta en við skulum vona ekki,“ sagði Brynjar Darri.

Það má sjá allt viðtalið sem og myndir frá skotinu í myndbandinu hér fyrir ofan.