Kvennalandsliðið jafnaði lengstu sigurhrinu sína frá upphafi

Sigurinn á Tékklandi var sjötti sigur Íslands í röð. Sigurgangan hófst einmitt með 4-0 sigri á Tékklandi í undankeppni HM á Laugardalsvelli síðasta haust.

Íslenska liðið jafnaði þar með sína lengstu sigurhrinu frá upphafi. Ísland vann einnig sex leiki í röð frá 6. september 1993 til 8. október 1994. 

Logi Ólafsson stýrði þá íslenska liðinu sem vann Grikkland og Holland tvisvar sinnum og Skotland og Wales einu sinni. Sigurgöngunni lauk þegar Ísland tapaði 1-2 fyrir Englandi á Laugardalsvelli í umspili um sæti á EM 8. október 1994. Sömu úrslit urðu í seinni leiknum á Englandi.

Ísland tapaði 0-2 fyrir Evrópumeisturum Hollands í fyrsta leik sínum í undankeppni HM síðasta haust en hefur síðan unnið sex leiki í röð, þar af þá fimm fyrstu án þess að fá á sig mark.

Íslendingar unnu Tékka 4-0 og Kýpverja 5-0 í undankeppni HM í október í fyrra og sigruðu Japani, 0-2, í vináttulandsleik og Kýpverja aftur í undankeppninni, 0-4, í nóvember. Ísland hefur svo unnið tvo fyrstu leiki sína á SheBelieves Cup, 1-0 gegn Nýja-Sjálandi og 1-2 gegn Tékklandi í nótt. Natasha Moora Anasi og Selma Sól Magnúsdóttir skoruðu mörk íslenska liðsins snemma leiks.

Framundan er úrslitaleikur gegn Bandaríkjunum í Dallas aðfaranótt fimmtudags. Íslendingum dugir jafntefli í leiknum til að vinna mótið. Það verður þó við rammann reip að draga gegn heimsmeisturunum sem Ísland hefur aldrei áður unnið.

Þorsteinn Halldórsson hefur nú stýrt íslenska landsliðinu í ellefu leikjum, átta hafa unnist, einn endað með jafntefli og tveir tapast. Markatalan er 24-7.

Flestir sigurleikir íslenska kvennalandsliðsins í fótbolta í röð