Efast ekki um að á­hættu­hópar ættu að þiggja þriðja skammtinn

Björn Rúnar var til viðtals í Reykjavík síðdegis á Bylgjunni í dag. Þar vísaði hann til stórrar greinar sem birtist í læknatímaritinu Lancet fyrir skömmu og segir greinina raunar hafa breytt hans skoðun á málinu. Greinin hafi sérstaklega sýnt fram á mikilvægi þess að bólusetja fjörutíu til fimmtíu ára og eldri, auk áhættuhópa.

„Það er enginn efi um það að þeir sem eru í áhættuhópi eiga að láta bólusetja sig með þriðja skammtinum, sérstaklega ónæmisbældir og aðrir með langvinna sjúkdóma. En svo var þessi stóra spurning: Á að bólusetja þá sem eru heilbrigðir en komnir í þennan áhættuhóp, það er að segja fjörutíu eða fimmtíu ára og eldri, sérstaklega fimmtíu ára og eldri. […] Þegar við horfum í hjarðónæmið, það sem ég hef alltaf hugsað um fyrst og fremst er að við séum að vernda það að fólk sé að fá alvarlegan sjúkdóm og leggjast inn á spítala, ég tala nú ekki um inn á gjörgæslu,“ segir Björn Rúnar.

Hann segir niðurstöður rannsókna er varða þriðja skammtinn vera afgerandi. Miðað sé við áhættuna hjá þeim sem teljist fullbólusettir með tveimur skömmtum bóluefnis, á móti þeim sem fengið hafa þriðja skammt.

„Þá eru niðurstöðurnar mjög sláandi. Það eru 93 prósent færri sem leggjast inn á spítalann, miðað við þá sem teljast fullbólusettir. Fyrir mjög alvarlegum sjúkdóm er vörnin 92 prósent [meiri] og fyrir dauða 80 prósent [meiri]. Þetta er mjög afgerandi þegar við höfum það í huga að við vitum að það að vera fullbólusett með tveimur skömmtum er veruleg vörn.“

Með þriðja skammti sé sú mikla vörn sem „full“ bólusetning gefur því margfölduð.

Tölur frá Ísrael lofi góðu

Í umræðunni um gagnsemi örvunarsbólusetningar hefur verið vísað til Ísraels, sem var meðal fyrstu ríkja til að bólusetja með þriðja skammti bóluefna við kórónuveirunni. Þannig vísaði Þórólfur Guðnason sóttvarnalæknis til árangurs Ísraela í Kastljósi í gær, þar sem hann sagði margt benda til þess að þriðji skammtur bóluefnis væri besta vonin til þess að ná hjarðónæmi hér á landi.

Aðspurður segist Björn Rúnar telja að í Ísrael sé hjarðónæmi farið að taka á sig mynd. Taka þurfi tillit til smittalna í samfélaginu en einnig alvarleika veikinda.

„Það væri allt í lagi að það væru smit í samfélaginu ef afleiðingarnar væru ekki svona alvarlegar fyrir hluta fólks. Þá kannski værum við ekki að hafa allar þessar áhyggjur. Ef við horfum á tölurnar, þessa kúrfu, frá Ísrael, þá hefur tíðnin hjá þeim snarlækkað síðustu vikur.“

Björn Rúnar segist telja að gögn frá Ísrael sýni fram á raunverulegan árangur örvunarbólusetninga.

Breytingar í kortunum

Björn Rúnar bendir þá á fréttir af því að möguleiki sé á því að nýtt lyf gegn Covid-19 verði samþykkt á næstunni. Um er að ræða lyfið Molnupiravir sem talið er draga verulega úr sjúkrahúsinnlögnum og dauðsföllum meðal Covid-sjúklinga. Bretland hefur þegar heimilað notkun veirulyfsins, sem Covid-sjúklingar þar í landi geta fengið uppáskrifað.

„Þannig að ég held að við eigum eftir að sjá miklar breytingar á þessu, næstu tvo mánuðina.“

Hann ítrekar þó að viðbótarskammtur bóluefnis muni hraða baráttunni við veiruna verulega, ef marka megi tölur frá Ísrael og kveðst í raun telja að örvunarskammturinn sé skjótvirkasta leiðin til þess að ná tíðni alvarlegra veikinda niður.

„Það er það sem þetta snýst um, fyrst og fremst. Að við losnum við það að vera í þessari erfiðu stöðu og jafnvel fresta mjög nauðsynlegum, jafnvel hjartaaðgerðum, út af því að gjörgæslan er full af fólki með Covid. Það er það sem við erum að reyna að koma í veg fyrir.